АСТАНА. 3 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев ОПЕК+ мұнай өндіру көлемін кезең-кезеңімен арттыру жөніндегі шешімді қолдады, деп хабарлады Мемлекет басшысының баспасөз қызметі.
«Президент Қазақстанның ұлттық мүдделерін қорғау басымдығын ескере отырып, ОПЕК+ мұнай өндіру көлемін кезең-кезеңімен арттыру туралы шешімді қолдайтынын атап өтті», – делінген Мемлекет басшысының баспасөз қызметінің хабарламасында. Бұл мәлімдеме Қасым-Жомарт Тоқаевтың ОПЕК Бас хатшысы Хайтам әл-Гайс мырзамен кездесуінің қорытындысы бойынша жасалды.
Мұнайдың жаһандық нарығындағы қазіргі жағдайды талқылау барысында Қазақстан басшысы ОПЕК-тің әлемдік мұнай нарығының тұрақтылығы мен болжамдылығын қамтамасыз етуге бағытталған күш-жігерін жоғары бағалады. Сондай-ақ ол Хайтам әл-Гайстың сапарын Қазақстан мен ОПЕК арасындағы сындарлы диалогты дамытуға маңызды қадам деп атады.
Тараптар өңірдің энергетикалық жүйесінің тұрақтылығын нығайтуға бағытталған бірлескен шараларды да қарастырды. Мұнай өндіруші елдер мен көмірсутектерді импорттаушы мемлекеттердің мүдделер теңгерімін қамтамасыз ету қажеттігі атап өтілді.
Бұған дейін хабарланғандай, жексенбі, 5 қазан күні ОПЕК+ ұйымының отырысы өтеді. Онда қараша айына арналған мұнай өндіру квоталары талқыланбақ. БАҚ пен сарапшылардың дерегінше, квоталар ұлғаюы мүмкін.
Бейсенбі күні Қазақстанның энергетика министрі Ерлан Әккенжанов ОПЕК+ келісімі аясында мұнай өндіруді өтеу кестесіне Қазақстан әзірге толық сәйкес келмей отырғанын мәлімдеді.
«Бұл тарихи тұрғыдан түсінікті. Қаңтардан бері Теңіз кен орнындағы ПБР (Болашақ кеңейту жобасы) іске қосылған соң өндіріс көлемі артты, сәйкесінше (өндірілген мұнай көлемі – ИФ-К) көбейді. Қазіргі таңда біз өтеу кестесіне толық сыймай отырмыз, бірақ Қазақстан ОПЕК+ келісімі бойынша барлық мүмкін шараларды қабылдап жатыр және осы келісімде қала береді», – деді Әккенжанов Астанада өткен XVI Eurasian KAZENERGY форумының кулуарында журналистерге.
8 қыркүйекте қабылданған шешімге сәйкес, бұған дейін өндірісті ерікті түрде шектеу туралы жариялаған, бірақ белгіленген квотадан асыра өндірген ОПЕК+ елдері 2026 жылдың шілдесіне дейін жиналған артық өндірістің 4,779 млн баррель/тәулікті (б/тәу) өтеуі тиіс. Жаңартылған кесте бойынша осы көлемнің жартысынан астамын Қазақстан өтеуі керек – 2,63 млн б/тәу. Өтеу процесі 2026 жылдың маусымына дейін жалғасады.
1 қазанда ОПЕК хабарлағандай, ұйым хатшылығы ұсынған жаңа кестеге сәйкес, Қазақстанның ОПЕК+ келісімі аясында толық орындалмаған өндірісін өтеу бойынша жинақталған қарызы 2,917 млн б/тәу деңгейіне жетті.
