ИЕРУСАЛИМ / ВАШИНГТОН. 6 қазан. ИНТЕРФАКС – ХАМАС қозғалысы АҚШ президенті Дональд Трамптың Газа секторына арналған бейбіт жоспары бойынша халықаралық бақылау аясында қарудан бас тартуға дайын екендігі туралы хабарламаларды жоққа шығарды.
Қозғалыстың саяси бюро мүшесі Махмуд әл-Мардавидің айтуынша, бұл ақпарат «жалған және еш негізсіз», сондай-ақ «қозғалыстың ұстанымын бұрмалап, қоғамды шатастыруды көздейді».
ХАМАС-тың қарусыздану мәселесі – «палестиналықтардың ішкі ісі және ол палестиналық саяси алаңда шешіледі», – деді Мысырдың сыртқы істер министрі Бадр Абдель Аты, деп хабарлайды Asharq Al-Awsat газеті.
Сонымен қатар, ХАМАС таратқан мәлімдемеге сәйкес, қозғалыс делегациясы атысты тоқтату шарттарын талқылау үшін Мысырға жеткен. Дүйсенбі күні Израиль мен ХАМАС арасындағы жанама келіссөздердің басталуы күтіліп отыр.
Бұған дейін ХАМАС-тың бір дереккөзі Al Arabiya телеарнасына қозғалыстың қаза тапқан израильдік тұтқындардың дене қалдықтарын жинай бастағанын хабарлаған болатын. Сондай-ақ ХАМАС Мысыр делдалдығымен Израильге әуе соққыларын тоқтату жөнінде өтініш жасаған.
АҚШ президенті Дональд Трамп өз кезегінде Израиль мен палестиналық ХАМАС қозғалысы арасындағы қақтығысты реттеу процесінің табысты жүріп жатқанын атап өтті, бірақ тараптарды оның жоспарын жүзеге асыруды жеделдетуге шақырды.
«Бұл келіссөздер өте нәтижелі және қарқынды жүруде. Техникалық топтар дүйсенбі күні Мысырда қайта кездесіп, соңғы егжей-тегжейлерді талқылайды. Маған бірінші кезеңнің осы аптада аяқталуы тиіс екені хабарланды, сондықтан барлығын тезірек әрекет етуге шақырамын», – деп жазды Трамп Truth Social желісінде.
