АСТАНА. 14 қазан. ИНТЕРФАКС-ҚАЗАҚСТАН – Қазақстан Премьер-министрі Олжас Бектенов сыртқы нарықтардан келіп жатқан инфляциялық қысым аясында бағаны тұрақтандыру және тұтынушылық несиелеуді реттеу шараларын күшейту қажеттігін атап өтті.
«Инфляциялық үдерістерді төмендету үшін ең алдымен тұтыну бағаларын тұрақтандыру бойынша жұмысты күшейту қажет. Ішкі нарықты отандық өніммен барынша қамтып, азық-түлік тауарларының тұрақтандыру қорларын жедел қалыптастыру қажет. Сондай-ақ тұтынушылық несиелеуді тұрақтандыруға бағытталған нақты шешімдер қабылдануы тиіс», – деді Үкімет басшысы сейсенбі күні өткен Үкімет отырысында.
Сондай-ақ, Премьер-министр бөліп төлеу шарттарына бақылауды күшейту қажеттігін еске салды.
«Банктер, кредиттік ұйымдар мен сауда орындары тауар бағасына кіретін бөліп төлеудің толық құнын және несиелеу кезіндегі барлық артық төлемдерді ашық көрсетуі тиіс», – деді Олжас Бектенов.
Осыған байланысты ол түсіндіру жұмыстарын бұқаралық ақпарат құралдары мен әлеуметтік желілер арқылы ұйымдастыруды тапсырды.
