АСТАНА. 14 қазан. ИНТЕРФАКС-ҚАЗАҚСТАН – Қазақстанда болашақта e-Parlament жүйесі енгізілуі мүмкін. Бұл жүйе заң шығару үдерісінің тиімділігін арттырып, сұранысқа ие құрал бола алады. Бұл туралы Мемлекет басшысы Қасым-Жомарт Тоқаев парламенттік реформа жөніндегі жұмыс тобының алғашқы отырысында айтты.
«Қазіргі кезде бірқатар елде азаматтардың саяси өмірге қатысуының жаңа формаларын қамтамасыз ететін, сондай-ақ заң шығару үдерісін тиімді жүргізуге бағытталған “электронды немесе цифрлық парламент” элементтері сынақтан өткізіліп жатыр. Бұл бағыттың болашағы зор. Біз де осы салаға басымдық беріп отырмыз. Алдағы уақытта e-Parlament еліміздегі электронды үкімет – e-Gov сияқты кеңінен қолданылатын құралға айналуы әбден мүмкін», – деді Президент.
Осыған байланысты Тоқаев бір палаталы парламентке көшу бастамасы жаңа мазмұн мен жұмыс ырғағына, шешім қабылдау қарқынына бейімделуге де бағытталғанын атап өтті.
«Уақыт өзгеруде. Ол өз талаптарын алға қояды. e-Parlament жүйесі – алыс перспектива емес, ол жақында жүзеге асады. Сондықтан қабылданатын заңдардың сапасына нұқсан келтірмеу – басты міндет», – деп түйіндеді Мемлекет басшысы.
