МӘСКЕУ. 14 қазан. ИНТЕРФАКС – Alphabet Inc. құрамына кіретін америкалық Google компаниясы Үндістанның оңтүстігінде деректер орталықтарын (дата-орталық) салуға $15 млрд инвестиция салатынын мәлімдеді. Бұл туралы Google Cloud басшысы Томас Куриан CNBC арнасына берген сұхбатында айтты.
Құрылысты алдағы бес жыл ішінде жүзеге асыру жоспарланып отыр. Нәтижесінде, АҚШ аумағынан тыс жерлердегі Google-дың ең ірі жасанды интеллект хабы қалыптасады. Оның жалпы энергия тұтыну қуаты 1 гигаваттты құрайды.
Үндістанның Андхра-Прадеш штатындағы адами ресурстарды дамыту жөніндегі министрі Нара Локештің айтуынша, бұл мәміле бір жыл бойы жүргізілген белсенді келіссөздердің нәтижесі. Ол бұл жаңалықты дүйсенбі күні X (бұрынғы Twitter) әлеуметтік желісінде жариялап, «бұл – тек бастамасы ғана» деп жазды.
Бұған дейін The Economic Times басылымы Google компаниясының Үндістандағы Raiden Infotech деп аталатын бөлімшесі аталған инвестицияларды жүзеге асырып, Андхра-Прадеш штатындағы Вишакхапатнам қаласында үш деректер орталығы кампусын салуды жоспарлап отырғанын хабарлаған болатын.
Сейсенбі күні сол басылым билік өкілдерінің мұндай инфрақұрылымдық жобаларды кеңейтуге ниетті екенін, сондай-ақ алдағы үш жылда штаттың есептеу қуатын айтарлықтай арттыру көзделіп отырғанын жазды.
