МӘСКЕУ. 14 қазан. ИНТЕРФАКС – Германия билігі ай сайынғы табысы 2 мың еуроға дейінгі зейнеткерлерді салықтан босатуды көздеп отыр. Бұл туралы Financial Times газетіне сілтеме жасаған басылым хабарлайды. Басылым аталған ақпаратты заң жобасының мәтініне сүйене отырып жариялаған.
Германия үкіметінің бағалауынша, бұл шара ел бюджетін жылына 890 млн еуро шығынға ұшыратуы мүмкін.
Канцлер Фридрих Мерцтің социал-демократтармен құрған коалициясы аталатын “белсенді зейнетақы жоспарын” осы аптада, сәрсенбі күні мақұлдауы күтілуде.
Financial Times басылымының жазуынша, бұл бастама елдегі еңбекке қабілетті халықтың қартаюы мен үш жылдық экономикалық тоқыраудан кейінгі білікті кадр тапшылығының теріс әсерін азайтуға бағытталған.
Германияда, Еуропаның басқа да елдері сияқты, зейнеткерлерге зейнетақыны сақтай отырып жұмыс істеуге рұқсат етілген. Дегенмен, Берлин мұндай жұмысты одан да тартымды ету үшін салықтық жеңілдіктер ұсынуды көздеп отыр.
«Германия еңбек нарығы демографиялық өзгерістердің салдарынан құрылымдық мәселелерге тап болды», – делінген заң жобасында.
Онда 1946–1964 жылдары аралығында дүниеге келген бейби-бумерлер буыны алдағы жылдары біртіндеп зейнетке шығатыны, ал еңбек нарығына қосылатын жастардың қатары азайып бара жатқаны айтылған. Бұл көптеген салада білікті кадрлар тапшылығына әкеп соқтыруы мүмкін.
