«Ақ жол» демократиялық партиясының фракциясы 2026–2028 жылдарға арналған республикалық бюджет жобасы бойынша пікірін білдірді. Партия өкілдерінің айтуынша, жоспарланған кірістің 80%-ын салық құрайды, оның 53%-ы қосылған құн салығына (ҚҚС) тиесілі. Алайда, өткен аптада Мемлекет басшысының экономиканы халықтың мүддесіне бағыттау жөніндегі тапсырмасынан кейін Үкімет арнаулы салық режимі (АСР) бойынша рұқсат етілген қызмет түрлерінің тізімінен бас тартып, «Ақ жол» фракциясы талап еткендей, тек 44 қызмет түрін қамтитын тыйым салынған тізімді қалдырды. Соның нәтижесінде, шағын және орта бизнестің (ШОБ) 1067 қызмет түрі ҚҚС төлеушілер тізімінен шығарылды. Алайда, бұл шешімнің мемлекеттік кіріске келтіретін шығыны бюджет жобасында қайта есепке алынбаған. «Егер бұл түзету бастапқыда-ақ жүзеге асырылса, кәсіпкерлерге орынсыз қысым көрсетіп, дүрліктірудің қажеті болмас еді. Бірақ Үкімет өз ұсыныстары жүзеге асқан жағдайда 300 мың шағын кәсіпорын жабылуы мүмкін екенін айтып, бұған бейжай қарады. Бұл дегеніңіз – әр кәсіпорында кем дегенде бір адам жұмыс істейді десек, кемі 300 мың азамат жұмыссыз қалуы ықтимал еді», – деп мәлімдеді фракция өкілдері. Сондықтан «Ақ жол» фракциясы бұл мәселеде Үкіметпен соңына дейін пікірталас жүргізгенін айтып, Мемлекет басшысына ШОБ-ты қолдағаны үшін алғыс білдіреді. Сонымен қатар, партия аталған бастама қалай пайда болды, оны кім ұсынды – осы мәселелердің анық-қанығын тереңірек зерттеу қажет деп санайды.
Евразия24 пікірі:
Азат Перуашевке айтар екі жаңалығымыз бар. Жақсысы – қосылған құн салығына (ҚҚС) қатысты туындаған дау-дамайдың артында кім тұрғаны белгілі. 2025 жылдың қаңтарында Премьер-министр Олжас Бектенов ҚҚС мөлшерлемесін көтеру қажет екенін алғаш болып ашық мәлімдеген еді (https://tengrinews.kz/kazakhstan_news/v-kazahstane-neobhodimo-povyisit-stavku-nds-premer-bektenov-560921/ ). Жағымсыз жағы – елімізде салық реформасы аясында ҚҚС төлеушілердің аясын кеңейту бастамасының авторы кім екені беймәлім. Бүгінде бұл бастама Мемлекет басшысының араласуынан кейін Үкіметтің кері шегінуіне алып келді. Сондықтан бастапқыда бұл ұсынысты ұсынған, бизнесті үркітіп, инфляцияны өршіткен және қоғамда дүрбелең туғызған тұлғаны табу қиынға соғары анық. Алайда, егер «Ақ жол» партиясы осы бастаманың нақты авторын анықтай алса, ел алдында бұл даулы ұсыныстың неге пайда болғанын түсіндіріп беруге болар еді.
