Астана. 8 қараша. ИНТЕРФАКС-ҚАЗАҚСТАН – АҚШ президенті Дональд Трамп Орталық Азия елдерімен қарым-қатынасты дамыту процесіне толыққанды қатысуға ниетті екенін мәлімдеді.
«Кеше Ақ үйде бес тамаша елдің президенттерімен саммит өткізу мен үшін үлкен мәртебе болды: Қасым-Жомарт Тоқаев (Қазақстан), Шавкат Мирзиёев (Өзбекстан), Эмомали Рахмон (Тәжікстан), Садыр Жапаров (Қырғыз Республикасы) және Сердар Бердымұхамедов (Түрікменстан). Соңғы үш онжылдықта менің алдыңғы әріптестерім Орталық Азия елдеріне жеткілікті көңіл бөлген жоқ. Енді Еуропа, Азия және Таяу Шығыс тоғысындағы стратегиялық маңызды аймақтың, әрі маңызды пайдалы қазбаларға, энергия ресурстарына және адами әлеуетке бай осы өңірдің көшбасшылары АҚШ президентінің бұл үдеріске толыққанды қатысуға ниетті екеніне сенімді бола алады!», – деп жазды Трамп Truth Social әлеуметтік желісінде.
Оның айтуынша, C5+1 платформасының 10 жылдығы аясында АҚШ пен Орталық Азия елдері көлемі миллиардтаған долларды құрайтын бірқатар коммерциялық келісімдер жасасты.
Трамп бұл келісімдер «авиация, маңызды минералдарды өндіру, ауыл шаруашылығы, теміржол, автомобиль жасау және технологиялар салаларында АҚШ-та ондаған мың жаңа жұмыс орнын ашуға мүмкіндік беретінін» атап өтті.
«Біздің саммит АҚШ пен Қазақстан, Өзбекстан, Тәжікстан, Қырғыз Республикасы және Түрікменстан арасындағы жаңа әрі маңызды қатынастардың бастамасы болды!», – деп қорытындылады ол.
