Астана. 13 қараша. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күні өткен жалпы отырыста Мәжіліс бұрын мақұлдаған “Тәуелсіз Мемлекеттер Достастығына мүше мемлекеттерде радиоактивті материалдарды трансшекаралық тасымалдау туралы келісімді ратификациялау туралы” заң жобасын қабылдады.
Осылайша, заң Парламент тарапынан толық мақұлданып, Мемлекет басшысына қол қоюға жолданады.
Құжаттың қорытындысына сәйкес, келісімнің негізгі мақсаттары – радиоактивті материалдарды трансшекаралық тасымалдау қауіпсіздігін қамтамасыз етуге жәрдемдесу, ядролық және радиациялық қауіпсіздікті арттыру, сондай-ақ физикалық қорғау қағидаттарын ескере отырып, ұлттық талаптарды оңтайландыру болып табылады.
Келісімнің ережелері ТМД-ға мүше мемлекеттердің аумағы арқылы теміржол, автомобиль, теңіз, ішкі су және әуе көлігімен жүзеге асырылатын трансшекаралық тасымалдарға қолданылады.
Тасымалдау келісімшарт (контракт) негізінде жүзеге асырылады. Жүк жөнелтушіде экспорттаушы елдің, транзиттік елдің және тағайындалған елдің уәкілетті органдары берген рұқсат құжаттары болуы тиіс. Бұл құжаттар тиісті мемлекеттердің заңнамасына сәйкес беріледі.
Сонымен қатар, радиоактивті материалдарды трансшекаралық тасымалдауға арналған келісімшартта ықтимал апаттардың алдын алу шаралары, апат жағдайындағы сақтандыру және қаржылық кепілдіктер, радиоактивті материалдарды физикалық қорғау жауапкершілігін тапсыру орны мен оны күзету жауапкершілігін беру тәртібі көрсетілуі қажет.
Сенатор Шәкәрім Бұқтұғұтовтың айтуынша, Қазақстан аумағы арқылы тасымалданатын негізгі радиоактивті материалдар – табиғи уран және басқа да материалдар.
«Елімізден уран экспорттаудың артуы қауіпсіздікке ерекше назар аударуды талап етеді. Себебі тасымал көлемі мен географиясының кеңеюі қауіп-қатерлердің де артуына алып келеді», – деді депутат.
Оның мәлімдеуінше, қазіргі уақытта ТМД-ға мүше үш мемлекет – Қырғыз Республикасы, Ресей Федерациясы және Беларусь Республикасы – бұл келісімді ратификациялаған.
