Zakon.kz порталының хабарлауынша, Қазақстан президенті Қасым-Жомарт Тоқаевтың қызметін жариялап жүрген қазақстандық журналист Әділ Балтабаев Мәскеуге сапары барысында Халықаралық қатынастар жөніндегі Мәскеу мемлекеттік институтының (МГИМО) студенті Кристина Юдинамен сұхбат өткізді. Мәліметтерге сүйенсек, Кристина Юдина Мәскеуде туып-өскен. «President» жобасының жүргізушісі қойған сұрақтарға жауап бере отырып, ол соңғы екі жыл бойы қазақ тілін үйреніп жүргенін айтты. Қазақ мәдениетіне деген қызығушылығы Алматыға барып, мектеп бітіру кешіне арналған көйлек іздеу кезінде оянған. Сонымен қатар, ол Қайрат Нұртастың әндерін тыңдағаннан кейін осы елдің мәдениетіне терең үңіле бастаған. Аталған әншіні таңдауының себебі туралы сұраққа Юдина оның сұхбатын көргенін, әрі онда әншінің көңілді әрі тартымды бейне қалдырғанын айтты. Сондай-ақ, ол өзінің сүйікті әндерінің бірі – «Байқа» туындысынан бірнеше жол орындап берді. Желі қолданушылары жарияланған бейнероликке түрліше пікір білдірді. Кейбіреулер оның қазақ тіліндегі айтылу мәнеріне қатысты ескертулер жасаса, енді бірі сәттілік тілеп, ешкімнің сынына мән бермеуге кеңес берді.
Евразия24 пікірі:
Қазақстанда мемлекеттік тілді меңгеруге қатысты жүйелі кедергілер бары бірнеше рет көтерілгені белгілі. Жуырда сенат депутаты Руслан Рүстемов та осы мәселеге тоқталып, қазақ тілін оқыту әдістемесінің жетілдірілмегенін сынға алған болатын.
Осындай жағдай қалыптасқан тұста, мәскеулік студент Кристина Юдинаның ешқандай міндеттеу немесе ресми талапсыз, жеке ықыласпен, қазақтың төл мәдениетінен шабыт алып, қазақ тілін үйреніп жүргені – назар аударарлық жайт. Бұл – тілге деген сүйіспеншілік пен қызығушылықтың оқулықтар мен бағдарламалардан тыс та пайда болатынының дәлелі.
Мұндай мысалдардың жаппай сипат алуы міндет емес. Дегенмен, бір нәрсе анық: егер жастардың бойында тіл иесі – халықтың мәдениетіне, өнеріне, тұлғаларына деген құрмет пен қызығушылық болса, мемлекеттік тілді үйренуге деген ынта да артады. Демек, әрбір қазақстандықтың өзінің «тілдік музасы» болса, қазақ тілінде сөйлейтіндердің қатары да көбейе түсер еді.
