BBC News орыс қызметінің хабарлауынша, 12 қараша, сәрсенбі күні Қазақстан Парламенті бұқаралық ақпарат құралдары мен интернет кеңістігінде «ЛГБТ насихатына» тыйым салатын заң жобасын бірауыздан қабылдады. Құжатта бұл нормалар балалардың денсаулығы мен дамуына зиян келтіретін ақпараттардан қорғау мақсатында енгізіліп отырғаны айтылған. Заңға сәйкес, педофилияны және дәстүрлі емес жыныстық қатынасты насихаттайтын ақпараттарды көпшілікке қолжетімді кеңістікте, сондай-ақ бұқаралық ақпарат құралдары, телекоммуникациялық желілер мен онлайн-платформалар арқылы таратуға шектеу қойылады. Бұл шектеулер елдің тоғыз заңнамалық актісіне енгізіледі. Ереже бұзғандарға 40 айлық есептік көрсеткішке дейін (2025 жылы шамамен 157 мың теңге) айыппұл салынады немесе 10 тәулікке дейін әкімшілік қамауға алу жазасы қарастырылған. Заң жобасының бастамашыларының бірі, Мәжіліс депутаты Елнұр Бейсенбаевтың айтуынша, заң жеке өмірге араласуды көздемейді:
«Егер, мысалы, ер адамдар саябақта қол ұстасып жүрсе — бұл насихатқа жатпайды. Бұл — олардың жеке кеңістігі, бұл жерде ешқандай мәселе жоқ», — деді депутат.
Евразия24 пікірі:
Саясаттанушы Данияр Әшімбаев ЛГБТ насихатына тыйым салуға қатысты қабылданған заң аясында өз көзқарасын білдірді. Сарапшының пікірінше, бұл заң тікелей қатынастарға емес, тек насихатқа бағытталғанымен, қоғамдағы кейбір топтар бұл мәселеде нақты мазмұннан гөрі, оның айналасындағы резонансты маңыздырақ санайтындай әсер қалдырады. ЛГБТ насихатына тыйым салуға қатысты қабылданған заң жобасы төңірегінде туындаған қызу пікірталастар кейбір мүдделі топтар үшін мәселенің мәні біржынысты қатынастарда емес, бұл тақырыпты ашық түрде талқылау мүмкіндігінде жатқанын көрсетеді. Сонымен қатар, бұл заң педофилияны насихаттауға да тыйым салатынын атап өткен жөн. Алайда бұл аспектке заң жобасына қарсы шыққандар жеткілікті мән беріп отырған жоқ. ЛГБТ насихаты негізінен балалар мен жасөспірімдерге бағытталғанын ескерсек, онда ЛГБТ-активистер мен «құқық қорғаушылар» нақты кімнің мүддесін қорғап жүр деген заңды сұрақ туындайды», – деді Әшімбаев. Сонымен бірге, қоғамда бұл заң аясында құқық қорғау органдарының тарапынан шамадан тыс шара қолдану қаупі бар деген алаңдаушылықтар да айтылуда. Яғни, шынайы насихат болмаған жағдайда да, заң нормаларына сай келетін негіз ізделіп, жазықсыз адамдарға қатысты жауапкершілік жүктелуі мүмкін деген қауіп бар. Мұндай сезімтал тақырыптарда қоғам тарапынан қысым күшейген жағдайда, билік өкілдері нақты заң бұзушылық болмаса да, құқықтық баға беруге тырысуы ықтимал. Осы тұрғыдан алғанда, бұл салада заңды теріс пайдалану қаупі – ең маңызды және басты тәуекелдердің бірі болып қала береді.
