Астана. 15 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Қазақстан мен Өзбекстан өз мүмкіндіктерін біріктіру арқылы өңірлік азық-түлік қауіпсіздігінің кепілі бола алатынын айтты. Бұл туралы Мемлекет басшысының баспасөз қызметі хабарлады.
«Ауыл шаруашылығы саласында тығыз ынтымақтастық орнату – басым бағыттардың бірі. Бұл салада Қазақстан мен Өзбекстанның ресурстық, өндірістік және кадрлық әлеуеті жеткілікті. Осы мүмкіндіктерді біріктіру арқылы біз бүкіл өңірдің азық-түлік қауіпсіздігін қамтамасыз етіп, жаһандық нарықтардағы позицияларымызды айтарлықтай нығайта аламыз», – деді Президент Ташкенттегі мемлекеттік сапары барысында өткен бұқаралық ақпарат құралдарына арналған бірлескен брифингте.
Мемлекет басшысы агроөнеркәсіп кешенінде бірқатар бірлескен жобалар, соның ішінде астық пен ет-сүт өнімдерін өңдеу бағыттары қарастырылып жатқанын айтты. «Агросектордағы бірлескен жобаларды жан-жақты қолдау жөнінде уағдаластыққа қол жеткіздік», – деді Қасым-Жомарт Тоқаев.
Сонымен қатар, Президент Қазақстанда өзбек капиталының қатысуымен 6 мыңнан астам кәсіпорын табысты жұмыс істеп жатқанын атап өтті. Оның айтуынша, тараптар өнеркәсіп, автомобиль жасау, құрылыс және энергетика салаларындағы ынтымақтастықты кезең-кезеңімен кеңейту жөніндегі жұмыстарды жалғастыруға келісті.
