Астана. 15 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Өзбекстанмен ауыл шаруашылығы саласындағы ынтымақтастықты дамыту аясында тауар алмасудың қарапайым түрінен неғұрлым кешенді өндірістік үдерістерге көшуді ұсынды. Бұл туралы Мемлекет басшысының баспасөз қызметі хабарлады.
«Қазақстан Президентінің айтуынша, екі елдің ауыл шаруашылығы саласындағы ынтымақтастығының әлеуеті зор. Тоқаев ет, астық пен майлы дақылдарды өңдеу, мал шаруашылығы мен органикалық егіншілікті дамыту бағытында толық өндірістік тізбектерді қалыптастыру арқылы қарапайым сауда-саттықтан бірлескен өндірістік кооперацияға көшу қажет екенін айтты», – делінген Жоғары мемлекетаралық кеңестің екінші отырысының қорытындысы бойынша жарияланған хабарламада.
Мемлекет басшысы сондай-ақ өнеркәсіптік кооперацияға зор үміт артатынын жеткізді.
«Қазіргі таңда жалпы құны 1,7 миллиард АҚШ долларынан асатын 78 бірлескен жоба жүзеге асырылуда. Бұл жобалар 15 мыңнан астам жұмыс орнын ашуға мүмкіндік береді. Осы жобалардың толық іске асуы екі ел арасындағы экономикалық және инвестициялық ынтымақтастықты едәуір нығайтады. Біз сол жобалардың кейбірін іске қосу рәсіміне қатысамыз», – деді Тоқаев.
Сонымен қатар Президент Қазақстан тарапының Өзбекстанға бағытталған инвестицияларын одан әрі ынталандыруға ниетті екенін, бұл ретте өзбек әріптестерінің дәстүрлі қолдауына сенім артатынын атап өтті.
«Өңірлік индустриялық әлеуетті күшейту ісінде қазір салынып жатқан “Орталық Азия” атты Халықаралық өнеркәсіптік кооперация орталығы маңызды рөл атқарады», – деді Мемлекет басшысы.
