Астана. 15 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев пен Өзбекстан Президенті Шавкат Мирзиёев бейнебайланыс режимінде Қазақстан мен Өзбекстанның бірлескен жобаларын іске қосу рәсіміне қатысты. Бұл туралы Мемлекет басшысының баспасөз қызметі хабарлады.
Хабарламада айтылғандай, жалпы құны 1,2 миллиард АҚШ долларын құрайтын жеті жоба іске қосуға дайындалды. Олар өнеркәсіп, құрылыс, мұнай-газ химиясы, қаржы, логистика және туризм салаларын қамтиды.
Мемлекет басшылары символикалық батырманы басу арқылы Сырдария және Түркістан облыстарында орналасқан “Орталық Азия” Халықаралық өнеркәсіптік кооперация орталығының, Ташкент қаласындағы Tenge Bank-тің бас кеңсесінің, Ташкент облысындағы көпсалалы логистикалық орталық құрылысының, Жаңа Ташкенттегі “Астана” тұрғын үй кешені мен “Астана” қонақүй кешенінің, Қашқадария облысындағы алкилбензол өндіретін мұнай-газ химия кешенінің және Қазақстан астанасындағы “Ташкент” қонақүй кешенінің жұмысына ресми түрде бастама берді.
Айта кетейік, Қазақстан Президенті Қасым-Жомарт Тоқаев 14–15 қараша күндері Ташкент қаласында мемлекеттік сапармен барды.
