Астана. 16 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Орталық Азия мемлекеттері басшыларының Консультативтік кездесулері форматына Әзірбайжанның қосылуын құптай отырып, мұндай әріптестіктің басты міндеті – өңірдегі тұрақтылықты күшейту екенін айтты.
«Мемлекет басшысы Әзірбайжан Президенті Ильхам Әлиевті жылы қарсы алып, оның Консультативтік кездесу форматына толыққанды қатысушы ретінде қосылуын тарихи шешім деп атады. Президент Бакудің жаңа мәртебесінде өңірлік ынтымақтастықты нығайтуға елеулі үлес қосатынына сенім білдірді», – делінген Қазақстан Президентінің Ташкентте өткен Орталық Азия мемлекеттері басшыларының VII Консультативтік кездесуінде сөйлеген сөзіне байланысты таратылған хабарламада.
Қасым-Жомарт Тоқаев Консультативтік кездесулердің тиімділігін атап өтті.
«Орталық Азия қазіргі таңда ауқымды өзгерістер кезеңінен өтіп жатыр. Шекаралардың жабықтығы мен оқшаулану кезеңі артта қалды деп сеніммен айтуға болады. Ортақ күш-жігермен қол жеткізілген өңірлік бірлік мемлекеттеріміз үшін даму мен халықаралық ынтымақтастықтың кең мүмкіндіктерін ашып отыр. Өңірдің жаһандық үдерістердегі рөлі жетекші державалар тарапынан мойындалып келеді», – деді Мемлекет басшысы.
Оның айтуынша, осындай жағдайда “Орталық Азия +” форматтарына қызығушылық артып келеді. Бұл ретте, ағымдағы жылы шетелдік серіктестермен өткен саммиттерді мысал ретінде келтіруге болады.
«Менің ойымша, мұндай әріптестіктің басты міндеттері – өңірдегі тұрақтылықты нығайту, орнықты даму мен өркендеуге жағдай жасау, мемлекеттеріміз бен халықтарымыздың әл-ауқаты мен тұрмысын жақсарту. Басты мақсат – Орталық Азияны қарқынды әлеуметтік-экономикалық дамып келе жатқан, жан-жақты ынтымақтастық орнаған, бейбітшілік пен гүлденудің өңірі ретінде нығайту», – деді Қасым-Жомарт Тоқаев.
