Астана. 24 қараша. ИНТЕРФАКС-ҚАЗАҚСТАН – Израиль, Қырғызстан, Куба, Ливан, Зимбабве және Сомали елдерінің жаңадан тағайындалған елшілері Қазақстан Президенті Қасым-Жомарт Тоқаевқа сенім грамоталарын табыс етті, деп хабарлады Мемлекет басшысының баспасөз қызметі.
Сенім грамоталарын келесі елшілер табыстады: Израиль Мемлекетінің елшісі Йоав Быстрицки, Қырғыз Республикасының елшісі Кудайберген Базарбаев, Куба Республикасының елшісі Альфредо Федел Ниевес Портуондо, Ливан Республикасының елшісі Джордж Абу Зейд, Зимбабве Республикасының елшісі Марк Грей Маронгве және Сомали Федеративтік Республикасының елшісі Фатхудин Али Мохамед.
Рәсім барысында Мемлекет басшысы Қазақстанның бейбітсүйгіш ел ретінде әлемнің барлық елдерімен достық қатынастарды нығайтуға мүдделі екенін атап өтті. Сонымен қатар, ол ішкі саяси бағыттың басты мақсаты – Әділетті Қазақстанды құру және «Заң және тәртіп» қағидатын жүзеге асыру екенін айтты.
Сөз соңында Қасым-Жомарт Тоқаев елшілерді Қазақстандағы дипломатиялық миссияларының ресми басталуымен құттықтап, олардың қызметіне жан-жақты қолдау көрсетуге дайын екенін жеткізді.
