Астана. 24 қараша. ИНТЕРФАКС-ҚАЗАҚСТАН – Қазақстан мен Катар сотталған азаматтарды беру туралы келісімге қол қойды. Бұл құжат Қазақстан Республикасының Бас прокуроры Берік Асыловтың Доха қаласына жасаған жұмыс сапары аясында Катардың Бас прокуроры Иса бен Саад Аль-Нуаймимен кездесуі қорытындысында рәсімделді, деп хабарлайды ҚР Бас прокуратурасының баспасөз қызметі.
Аталған келісім шетел сотының үкімі бойынша бас бостандығынан айыру жазасына кесілген азаматтарға өздерінің азаматтық тиесілігі бар мемлекетінде жаза өтеуге мүмкіндік береді.
Сонымен қатар, тараптар екі елдің прокуратура органдары арасындағы өзара іс-қимыл мен ынтымақтастық туралы меморандумға қол қойды. Құжат аясында қадағалау қызметіндегі тәжірибе, құқықтық және басқа да ақпарат алмасу жоспарланып отыр.
Баспасөз қызметінің мәліметінше, бұған дейін, 2024 жылғы 14 ақпанда, Қазақстан мен Катар арасында қылмыстық істер бойынша өзара құқықтық көмек көрсету және экстрадиция туралы келісімдерге қол қойылған болатын.
«Осылайша, Қазақстан Республикасы мен Катар мемлекеті арасында қылмыстық сот ісін жүргізу саласындағы толыққанды шарттық-құқықтық база қалыптасты. Бұл екі елдің қадағалау органдарына заңдылық пен қоғамдық тәртіпті қамтамасыз ету, азаматтардың құқықтарын қорғау және қылмыспен күрес бағытында күш-жігерді біріктіруге мүмкіндік береді», – делінген Бас прокуратура таратқан хабарламада.
