Лондон, 29 қараша. ИНТЕРФАКС. Airbus 320 ұшақтар тобына жататын шамамен 6 мың әуе кемесі борттық жүйелерді қайта бағдарламалау үшін уақытша пайдаланудан шығарылды. Осыған байланысты көптеген әуе компаниялары рейстерді кейінге шегеруге немесе мүлде тоқтатуға мәжбүр болды, деп хабарлайды сенбі күні Sky News.
Ақау, атап айтқанда, British Airways, Air Lingus, Lufthansa, American Airlines, Delta және Wizz Air секілді әуе компанияларының жұмысына әсер етті.
Борттық жүйелерді қайта бағдарламалау қажеттілігі бір ай бұрын бағдарламалық жасақтаманы жаңарту кезінде орын алған қателіктен кейін туындаған. Сол кезде бір ұшақ кенеттен биіктігін жоғалтып, төтенше жағдайға тап болған. Airbus сарапшылары жүргізген талдау нәтижесінде «маңызды деректерге жоғары күн радиациясының әсер етуі мүмкін» екені анықталған.
Airbus компаниясының өкілдерінің айтуынша, қазіргі кезде борттық жүйелерді бұрынғы нұсқаға қайтару қажет, бұл процесс 2–3 сағатты алуы мүмкін. Алайда кейбір әуе кемелеріне жүйені толықтай қайта орнатуға тура келеді.
