Вашингтон, 29 қараша. ИНТЕРФАКС. АҚШ мемлекеттік хатшысы Марко Рубио Құрама Штаттар ауғанстандық азаматтарға кіру визаларын беруді уақытша тоқтатқанын мәлімдеді.
«Мемлекеттік департамент ауған паспортымен сапар шегетін тұлғаларға виза беруді дереу тоқтатады», – деп жазды Рубио Х әлеуметтік желісіндегі ресми парақшасында.
Ол бұл шешімнің АҚШ-тың ұлттық қауіпсіздігі мен қоғамдық тәртібін қамтамасыз ету мақсатында қабылданғанын атап өтті.
АҚШ Азаматтық және иммиграциялық қызметі (USCIS) директоры Джозеф Эдлоу да өз мәлімдемесінде ведомство барлық босқын мәртебесін беру шешімдерін уақытша тоқтатқанын хабарлады. Бұл шешім әрбір өтініш иесі мұқият тексеруден өткенге дейін күшінде болады.
«USCIS босқын мәртебесін беру туралы барлық шешімдерді уақытша тоқтатты. Біз әрбір шетелдік азаматтың барынша толық тексеруден өткені анықталғанға дейін шешім шығармаймыз. Америкалық азаматтардың қауіпсіздігі – біз үшін басты басымдық», – деп жазды Эдлоу Х әлеуметтік желісінде.
Аталған шешімдер 27 қараша күні Ақ үй маңында ауған азаматының АҚШ Ұлттық ұланының екі қызметкеріне шабуыл жасаған оқиғасынан кейін қабылданды.
