ДЕЛИ. 5 желтоқсан. ИНТЕРФАКС – Үндістанда Ресей Федерациясы Президенті Владимир Путиннің мемлекеттік сапарының екінші күні өтіп жатыр. Бүгін сапардың ресми іс-шаралары өтуде.
Путин кеше Нью-Дели қаласына келген. Ресей тарапын таңқалдырған жайт – Үндістан Премьер-министрі Нарендра Моди президентті үнді әскери-әуе күштерінің Палама базасында жеке өзі қарсы алды.
Моди мен Путин бірге бір көлікпен әуебазадан кетіп, жабық есік жағдайындағы кездесуге жол тартты. Мәскеу бұл кездесуді сапар бағдарламасындағы негізгі тармақтардың бірі деп атады.
Ресей Президентінің көмекшісі Юрий Ушаков бұған дейін брифинг барысында кездесудің жабық түрде өтетінін мәлімдеген болатын. Оның айтуынша, мұндай форматта ең өзекті, ең сезімтал және маңызды мәселелер – екіжақты қарым-қатынастар мен халықаралық жағдайға қатысты жайттар талқыланады.
Кремль өкілі атап өткендей, Мәскеу мен Нью-Дели бұл сапарға үлкен мән беріп отыр. “Бұл сапар ұзақ уақыт бойы жоспарланған және біз оның табысты өтетініне, екі ел арасындағы достық қарым-қатынасты одан әрі нығайтуға ықпал ететініне сенеміз”, – деді Ушаков.
Сапардың ресми бөлігі Үндістан Президенті Драупади Мурму мен Премьер-министрі Нарендра Моди қатысқан қарсы алу салтанатымен басталды. Кейін Путин Махатма Гандидің мемориалына гүл шоқтарын қойып, Құрметті қонақтар кітабына жазба қалдырады.
Іскерлік бағдарлама Хайдарабад сарайында өтеді. Путин мен Моди шағын құрамда келіссөздер жүргізіп, кейін кеңейтілген құрамда делегациялар қатысатын ресми кездесулер жалғасады.
Ресей басшысын бұл сапарға жоғары лауазымды тұлғалар мен бизнес өкілдерінен тұратын делегация алып жүр. Олардың қатарында Қорғаныс министрі Андрей Белоусов, Ауыл шаруашылығы министрі Оксана Лут, Денсаулық сақтау министрі Михаил Мурашко, Көлік министрі Андрей Никитин, Экономикалық даму министрі Максим Решетников, Қаржы министрі Антон Силуанов және Ішкі істер министрі Владимир Колокольцев бар.
Сонымен қатар делегация құрамында Ресей Орталық банкінің төрайымы Эльвира Набиуллина, Әскери-техникалық ынтымақтастық жөніндегі федералдық қызмет басшысы Дмитрий Шугаев, Роспотребнадзор басшысы Анна Попова, Кеден қызметі, Қаржы мониторингі агенттігі, Роскосмос, Росатом, ВЭБ секілді ірі құрылымдардың өкілдері бар.
Ушаковтың айтуынша, ірі бизнес өкілдері де сапарға үлкен қызығушылық танытқан. Алайда үнді тарапынан қойылған хаттамалық шектеулерге байланысты делегация құрамы шектелді.
Келіссөздердің қорытындысы бойынша тараптар құжаттармен алмасып, Путин мен Моди БАҚ өкілдеріне бірлескен мәлімдеме жасайды. Кейін Үндістан премьер-министрінің атынан ресейлік президенттің құрметіне ресми қабылдау ұйымдастырылады, оған концерттік бағдарлама да енгізілген.
Сапардың жалғасы ретінде Путин Үндістан президенті және премьер-министрімен бірге Ресей-Үндістан іскерлік форумының пленарлық отырысына қатысады. Форумға екі елдің 150-ге жуық ірі бизнес өкілдері жиналады.
Кешке қарай Президент Мурмумен жеке кездесу өтеді. Одан кейін Үндістан Президентінің атынан Владимир Путиннің құрметіне ресми мемлекеттік қабылдау ұйымдастырылады.
