АСТАНА. 5 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаевтың айтуынша, елдегі цифрландыру мен жасанды интеллект (ЖИ) технологияларын енгізудің нәтижесінде ішкі жалпы өнім (ЖІӨ) $14-тен $20 млрд-қа дейін ұлғаюы мүмкін. Бұл туралы Мемлекет басшысының баспасөз қызметі хабарлады.
«Қазақстан үшін цифрландыру мен жасанды интеллект құралдарын енгізудің нәтижесі $14–20 млрд көлемінде ЖІӨ-ге қосымша үлес беруі мүмкін. Мұндай есеп бар. Оның дәлдігі – уақыттың еншісінде. Біз бұл мүмкіндіктерді толыққанды пайдалануымыз қажет», – деді Президент Тоқаев жұма күні «Алтын сапа» және «Парыз» сыйлықтарының лауреаттарын, сондай-ақ «Қазақстанның үздік тауары» республикалық байқауының жеңімпаздарын марапаттау рәсімінде.
Мемлекет басшысының айтуынша, сарапшылардың болжамына сәйкес, 2030 жылға қарай әлемдік ЖІӨ-ге жасанды интеллект $17–26 трлн аралығында қосымша үлес қосып, 78 млн жұмыс орны құрылады.
«Мемлекет пен бизнес арасындағы диалог жаңа сипатқа ие болуы тиіс. Бұл ретте цифрландыру мен жасанды интеллект технологияларын тиімді пайдалану қажет», – деді Қасым-Жомарт Тоқаев.
Ол сондай-ақ, жасанды интеллекттің қарқынды дамуы жаһандық экономикада түбегейлі өзгерістерге жол ашып отырғанын атап өтті.
