АСТАНА. 5 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев үкіметке инфляцияны тұрақтандыру және төмендету, экономиканың тұрақты өсімін және азаматтардың нақты табысын қамтамасыз ету жөнінде нақты тапсырма берді.
«Үкіметтің жүргізіп отырған экономикалық саясаты аясында аса өзекті міндеттер – инфляцияны тұрақтандыру мен төмендету, экономиканың тұрақты өсуі мен азаматтардың нақты табысын арттыру болып табылады. Осы мәселелерді шешу үшін Үкімет, Ұлттық банк және Қаржы нарығын реттеу және дамыту агенттігі бірлесіп 2026–2028 жылдарға арналған іс-қимыл бағдарламасын қабылдады», – деді Мемлекет басшысы жұма күні «Алтын сапа» және «Парыз» сыйлықтарының лауреаттары мен «Қазақстанның үздік тауары» республикалық байқауының жеңімпаздарын марапаттау рәсімінде.
Президент аталған бағдарламаны тиімді жүзеге асыру үшін барлық салалық мемлекеттік органдар мен жергілікті атқарушы органдар күш біріктіруі қажет екенін атап өтті.
«Кәсіпкерлер үшін салық, тариф және реттеу саясатының әділеттілігі мен болжамдылығы ерекше маңызды. Мемлекет пен бизнес арасындағы өзара іс-қимыл моделін жаңғырту жаңа Салық кодексі арқылы іске асады», – деп түйіндеді Қасым-Жомарт Тоқаев.
