БРЮССЕЛЬ. 5 желтоқсан. ИНТЕРФАКС-ҚАЗАҚСТАН – Германия канцлері Фридрих Мерц, Бельгия премьер-министрі Барт де Вевер және Еурокомиссия төрайымы Урсула фон дер Ляйен арасындағы Брюссельдегі үшжақты кездесу Еурокомиссияда Ресей активтерін пайдалану мәселесіне қатысты жаңа келіссөздердің бастамасы ретінде қарастырылып отыр. Бұл туралы Еурокомиссия өкілі Паула Пинью мәлімдеді.
«Бұл кездесу комиссияның екі күн бұрын ұсынған бастамасын тереңірек талқылауға жол ашады. Бұл – Еуроодаққа мүше елдермен, соның ішінде Бельгиямен консультация бастауға арналған заңнамалық ұсыныс. Құжат желтоқсанда өтетін Еуропалық кеңес отырысы (18–19 желтоқсан) қарсаңында түрлі пікірлерді ескере отырып, талқыланады», – деді ол брифингте.
Пиньюдың айтуынша, Еурокомиссия төрайымы Урсула фон дер Ляйен мен Еуропалық кеңес басшысы Антониу Кошта алдағы саммитте Украинаға қаржылай көмектің бір нұсқасын мақұлдатуды көздеп отыр. Бұл – 2026–2027 жылдары Украинаға қолдау көрсету тетіктерін іздеуді көздейтін Еуропалық кеңестің тапсырмасына сәйкес ұсыныс.
Оның айтуынша, Бельгия үкімет басшысының Ресей активтерін пайдалануға қатысты алаңдаушылығы аталған үшжақты кездесуде талқыланатыны сөзсіз.
Пинью Еурокомиссия бұған дейін ұсынған үш түрлі нұсқа мүше елдермен белсенді талқыланғанын, оның нәтижесінде 2025 жылғы 3 желтоқсанда қабылданған нақты ұсыныстың әзірленгенін айтты.
Еурокомиссия өкілінің мәліметінше, талқылау барысында Бельгияның алаңдаушылығы ескеріліп, Ресей активтеріне қатысты шешімдерді қолдану аясы кеңейтілген. Бұған дейін негізінен Бельгияда орналасқан Ресей активтері туралы сөз болған, кейіннен қауіпсіздік кепілдіктері мен жауапкершілікті ортақтасуға бағытталған механизмдер ұсынылған.
Журналистердің «Мерц, фон дер Ляйен және де Вевер кездесуінен қандай да бір серпіліс күтуге бола ма?» деген сұрағына Пинью нақты жауап беруден бас тартты.
«Мұндай заңнама бұрын-соңды қабылданбаған. Сондықтан сұрақтар қою – заңды. Қазіргі жүріп жатқан консультациялық үдеріс осыған жауап іздеуге бағытталған», – деді ол.
Еске салайық, 3 желтоқсанда Еурокомиссия 2026–2027 жылдары Украинаға қолдау көрсету мақсатында екі түрлі қаржыландыру тетігін ұсынды: ЕО қарыз тарту мүмкіндігі және репарациялық несие. Соңғысы Ресей Орталық банкінің бұғатталған активтерін ұстаушы еуропалық қаржы институттарынан қаражат тартуға мүмкіндік береді.
