Мәскеу. 5 желтоқсан. ИНТЕРФАКС – БҰҰ-ның Азық-түлік және ауыл шаруашылық ұйымы (ФАО) таратқан материалдарға сәйкес, 2025/26 ауыл шаруашылық маусымында әлемде астық өндірісі алғаш рет 3 млрд 3 млн тоннаға жетуі мүмкін.
«Бидай өндірісінің көлемі бойынша болжамның жоғарылауы ең алдымен Аргентинада рекордтық өнім алу күтілуімен байланысты. Сонымен қатар, Еуропалық Одақ пен АҚШ-та да өндіріс көлеміне қатысты оң болжам жасалды», – делінген ФАО есебінде.
Фураждық астық, әсіресе арпа бойынша өндіріс көлемі де біршама артады деп күтілуде.
Ал күрішке келсек, оның өндірісі 558,8 млн тоннаға жетіп, тарихи рекорд орнатуы мүмкін. Бұл өткен жылмен салыстырғанда 1,6%-ға жоғары. Өндірістің негізгі өсімін Бангладеш, Бразилия, Қытай, Үндістан және Индонезия қамтамасыз етеді. Бұл елдердегі өсім Мадагаскар, Непал, Пәкістан, Тайланд және АҚШ-тағы өндірістің қысқаруын өтейді деп болжанып отыр.
2026 жылғы өнімге арналған егіс науқаны Солтүстік жарты шарда аяқталғанын хабарлай отырып, ФАО АҚШ-та күздік бидай егістігінің тек 45%-ы жақсы немесе өте жақсы күйде екенін мәлімдеді. Бұл өткен жылмен салыстырғанда 10 пайыздық тармаққа төмен, себебі кей өңірлерде әлі де құрғақшылық байқалуда.
«ЕО аумағында егіс науқаны негізінен қолайлы ауа райы жағдайында өтіп жатыр, дегенмен Италияның кейбір өңірлерінде жауын-шашын тапшылығы бидай егістігінің жай-күйіне қатысты алаңдаушылық туғызуда. Ресейде күздік бидай өсірілетін негізгі аймақтарда да негізінен ауа райы қолайлы болды, және қараша айына қарай егіс жұмыстары аяқталды», – делінген хабарламада.
Үндістанда қолайлы баға конъюнктурасы мен мемлекеттік қолдау шаралары аясында егіс көлемі өткен жылғы рекордты көрсеткіштен асып түсуі мүмкін. Пәкістанда да егіс алқаптарының орташа көрсеткіштен жоғары болу ықтималдығы бар.
Оңтүстік жарты шарда бастапқы болжамдарға сәйкес, Аргентинада фураждық астық, әсіресе жүгері өндірісі артып, бұл егіс көлемінің ұлғаюымен байланысты болмақ. Бразилияда ішкі және сыртқы сұраныстың жоғары болуына байланысты жүгеріге арналған егіс көлемі мен өнім көлемі соңғы бес жылдағы орташа көрсеткіштен жоғары болуы мүмкін.
2025/26 маусымында әлемдік астық саудасының көлемі 500,6 млн тоннаға жетіп, өткен маусыммен салыстырғанда 3,3%-ға артады деп күтілуде.
«Бидай саудасы 2024/25 маусымындағы салыстырмалы түрде төмен деңгейден кейін қайта жанданады. Пәкістан мен Түркияның импортты қайта бастауы, сондай-ақ Азиядағы басқа да ірі импорттаушы елдердің белсенділігі – қазіргі нарықтағы тұрақты баға мен жеткілікті экспорттық ұсыныстың көрсеткіші. Сонымен қатар, 2025/26 маусымында фураждық астықтың да сауда көлемі артуы мүмкін. Бұл ретте Бразилия алғаш рет тарыны (сорго) экспорттайтын ел ретінде нарыққа шығуы ықтимал», – деп мәлімдеді ФАО.
