Астана. 9 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев шетелдердегі дипломатиялық корпусқа қатысты бірқатар кадрлық тағайындаулар жасады. Бұл туралы мемлекет басшысының баспасөз қызметі хабарлады.
Президенттің жарлығымен Бақыт Дүйсенбаев Чехия Республикасындағы Қазақстанның Төтенше және Өкілетті Елшісі қызметінен босатылды. Аталған лауазымға осыған дейін Нидерланд Корольдігіндегі Қазақстанның елшісі әрі Химиялық қаруға тыйым салу жөніндегі ұйым жанындағы Қазақстанның Тұрақты өкілі қызметін қоса атқарған Қайрат Әбдірахманов тағайындалды.
Қазақстанның Нидерландтағы Төтенше және Өкілетті Елшісі, сондай-ақ Химиялық қаруға тыйым салу жөніндегі ұйым жанындағы Қазақстанның Тұрақты өкілі қызметін қоса атқаратын тұлға болып Ақан Рахметуллин белгіленді.
Сонымен қатар Бельгиядағы Қазақстан елшісі, Қазақстанның Еуропалық одақ пен Солтүстік Атлантикалық шарт ұйымы (НАТО) жанындағы өкілдігінің басшысы Роман Василенко Люксембургтегі Қазақстанның Төтенше және Өкілетті Елшісі қызметін қоса атқаратын болды.
