Астана. 9 желтоқсан. ИНТЕРФАКС-ҚАЗАҚСТАН – 2025 жылдың он айының қорытындысы бойынша Қазақстанда әуе көлігімен 13,1 млн жолаушы тасымалданды. Бұл көрсеткіш өткен жылдың сәйкес кезеңімен салыстырғанда 6,5%-ға жоғары. Бұл туралы Үкімет отырысында Көлік министрі Нұрлан Сауыранбаев мәлімдеді.
Министрдің айтуынша, жүк тасымалын ұйымдастыруда негізгі цифрлық құрал ретінде e-Freight жүйесі қолданылуда. Аталған жүйені елдегі барлық әуежайлар мен авиакомпаниялар пайдаланады және ол IATA халықаралық стандартына сәйкес келеді.
Теміржол арқылы жүк тасымалы да өсім көрсетті: көлемі 7,9%-ға артып, 380,3 млн тоннаға жетті. Нұрлан Сауыранбаевтың мәліметінше, Digital Trade Corridor жобасын қоса алғанда, цифрландыру бастамалары транзиттік жүк ағынын ұлғайтуға бағытталған. Сондай-ақ электронды декларациялау мен «Бірыңғай терезе» арқылы қызмет көрсету халықаралық тасымалдаушылар үшін кедергілерді азайтып, сенімділікті арттыруға ықпал етеді.
Есепті кезеңде автомобиль көлігімен 288 млн тонна жүк тасымалданды, өсім 1,7%-ды құрады. Министр автоматтандырылған бақылау станциялары құқық бұзушылықтарды анықтау деңгейін және бюджетке түсетін түсім көлемін он есеге арттырғанын атап өтті. Соңғы бес айдың қорытындысы бойынша Бас прокуратурамен интеграция арқылы 10 мыңнан астам айыппұл төлеу туралы нұсқама рәсімделген.
«Автомобиль көлігімен жүк тасымалы 42 елмен жүзеге асырылуда. Өткен жылы Қытай мен Өзбекстанмен арадағы рұқсат бланкілері қағаз форматынан электрондық форматқа көшірілді. Қазіргі уақытта Әзербайжан жүйесімен интеграциялау бойынша техникалық жұмыстар жүргізілуде. Ал алдағы кезеңде Түркия және Қырғызстанмен осындай жұмыстарды іске асыру жоспарланып отыр», – деді Көлік министрлігінің басшысы.
