Вашингтон. 27 желтоқсан. ИНТЕРФАКС – АҚШ-тың солтүстік-шығысында орын алған күшті қарлы боран салдарынан Нью-Йорктегі үш әуежайда және Филадельфия халықаралық әуежайында жұма күнінен бастап 1,5 мыңнан астам әуе рейсі тоқтатылды. Бұл туралы The New York Times газеті хабарлады.
Қарлы боранның салдарынан тек сенбі күні ғана Нью-Йорктен 500-ге жуық әуе рейсі ұша алмады.
Билік өкілдері қардың қалың түсуі мен көктайғаққа байланысты елдің солтүстік-шығысындағы бірқатар өңірлерде, соның ішінде Нью-Йорк маңында, автокөлікпен қатынау аса қауіпті екенін ескертті. Қаланың орталық бөлігінде, Манхэттен ауданында да көлік қозғалысы айтарлықтай қиындаған.
Синоптиктердің болжамынша, Нью-Йорк аймағында сенбі күні де, жұмадағыдай, 25 сантиметрге дейін қар түсуі мүмкін. Бұл соңғы төрт жыл ішіндегі қалаға әсер еткен ең күшті қарлы борандардың бірі болуы ықтимал.
Жұма күні басталған қалың қар штат Нью-Йорктың жекелеген бөліктерінде, сондай-ақ Пенсильвания, Нью-Джерси, Коннектикут, Батыс Массачусетс және Род-Айленд штаттарында жалғасады деп күтілуде. Нью-Джерси мен Нью-Йорк штаттарында төтенше жағдай режимі жарияланды. Ал Пенсильванияның кейбір аудандарында мұзды дауыл туралы ескерту енгізіліп, электр энергиясының жаппай өшуі мен ағаштардың құлау қаупі бар екені хабарланды.
