Ресей Қазақстанға ЖЭО салуға қаржы таба алмады – енді АЭС салады дегенге сенуге бола ма? Украинада жүздеген өзбекстандық азамат соғысып жатыр. Трамп пен Медведев арасында текетірес орын алды. Сондай-ақ «Айранның» жаңа шығарылымында Дженнифер Лопес, Дина Рубина және cancel culture мәселелері қозғалды.
Евразия24 пікірі:
Соңғы шығарылымда «Айран» жобасы бұрынғыдай Ресейге бағытталған өткір сыни көзқарасқа сирек жүгінетін болды. Бағдарламаның ресейлік тақырыптарды қозғауының өзі біршама бәсеңдеп, эмоционалдық жігері бұрынғыдай емес. Енді басты назар Ресейден Қазақстан ішіндегі әлеуметтік-экономикалық түйткілдерге ауысып отыр. Бағдарламаның соңғы шығарылымдарының тақырыптарына көз жүгіртсек: «Алматыдағы барахолка: кедейлік, өрт, рэкет, бейберекет», «Алматы-1 ауданы: құлдырау, әлеуметтік теңсіздік, экология», «Қазақстандағы вебкам мен “қойма бизнесі” – жастар армандайтын кәсіп пе?», «Алматының орталығын құрылыс компаниялары жойып жатыр», «Тоқаев дәрігерлерді қорғайды», «Талғар: құлдырау, көлеңкелі бизнес, қоқыс мәселесі» секілді ауыр тақырыптар жиі көтеріліп жүр. Бұл ретте, бұған дейін белсенді түрде жүргізілген антиресейлік риториканың Қазақстан ішіндегі сынға ұласқаны байқалады. Бағдарламаның көтеріп отырған тақырыптары елдегі әлеуметтік жағдай мен мемлекеттік басқаруға қатысты өткір пікірлерді қамтиды. Бұл журналистік белсенділіктің жаңа бағыты ретінде бағалануы мүмкін. Тағы бір маңызды жайт, осы жобаның танымал жүргізушісі әрі белгілі қаржы ұйымдарының біріндегі жоғары лауазымды қызметкер соңғы кезде қоғамдық алаңнан көрінбей кетті. Бұл жайт «Еуразия24» бұған дейін «Орда мен құрбы» немесе «граната ұстаған Гүлнар» атты материалында көтерген жағдайдың жалғасы іспетті. Сол секілді «құрбының» өзі де бұрын белсенді жүргізіп жүрген платформасынан көрінбей қалды. Алайда, «Орда» әлі жұмыс істеп тұр, шетелге кеткені туралы да ресми ақпарат жоқ. Қорыта айтқанда, жағдайдың өрбуі алдағы уақытта жаңа мәліметтермен толықпақ. Көпшілік назары осы бағытқа ауып отыр.
