Еуразиялық даму банкі хабарлайды: 2025 жылдың қорытындысы бойынша 12,3%-ды құраған инфляция деңгейі 2026 жылдың соңына қарай жылдық көрсеткіште 9,7%-ға дейін төмендейді деп болжануда, бұл дезинфляциялық бағытқа көшуді білдіреді. Қатаң ақша-кредит шарттары, теңгенің нығайған бағамы, тұтынушылық сұраныстың тұрақтануы және реттелетін бағаларды шектеу шаралары инфляцияның баяулауына ықпал етуін жалғастырмақ. Осы факторлардың арқасында баға өсімінің бәсеңдеу процесі алдағы уақытта да сақталады: 2027 жылы инфляция жылдық деңгейде 6,2%-ды, ал 2028 жылы 5,0% шамасын құрайды деген болжам бар. Қатаң ақша-кредит шарттары баға өсімін тежейтін негізгі фактор болып қала береді. Жоғары базалық мөлшерлеме теңгедегі жинақтардың тартымдылығын сақтап, несиелендіру белсенділігін шектейді. Мұндай жағдайлар 2026 жылы инфляцияның кезең-кезеңімен төмендеуіне септігін тигізеді. Сонымен қатар, 2026 жылы теңгенің неғұрлым нығайған бағамы дезинфляциялық процестерді қолдауды жалғастырады. Салыстырмалы түрде тұрақты әрі нығайған бағамның сақталуы сырттан әкелінетін тауарлардың, шикізат пен жиынтықтауыштардың құнын шектейді деп күтілуде. Бұл баға өсімінің бұдан былай да баяулауына қажетті жағдайлар жасайды».
Еуразия24 пікірі:
Еуразиялық даму банкінің (ЕАДБ) Қазақстан Үкіметі мен Ұлттық банкіне арналған макроэкономикалық болжамы билік үшін көңілге медеу боларлық жаңалық деуге болады. Өйткені соңғы бірнеше жыл бойы мемлекеттік органдар күрделі жағдайда жұмыс істеп келді: макроэкономикалық көрсеткіштер қаншалықты оң нәтижелер көрсеткенімен, азаматтар елдегі ахуалды ең алдымен дүкен сөрелеріндегі баға арқылы бағалайтын. Ал екі таңбалы инфляция жалақының (әрине, медианалық жалақының), әлеуметтік төлемдердің және жалпы экономиканың өсіміне қатысты көптеген жетістіктердің әсерін әлсірете алады. ЕАДБ-ның инфляцияның бір реттік баяулауын ғана емес, тұрақты дезинфляциялық траекторияға шығуын болжап отырғаны ерекше назар аудартады. Егер бұл болжам жүзеге асса, Қазақстан 2025 жылғы 12,3 пайыздық инфляция деңгейінен 2028 жылы шамамен 5 пайызға дейін төмендеу кезеңінен өтеді. Инфляция деңгейі жоғары ел үшін бұл елеулі жетістік болар еді. Алайда болжамның өзінде белгілі бір ирония да бар сияқты. Болашақта инфляцияның төмендеуінің негізгі факторлары ретінде еңбек өнімділігінің күрт артуы, отандық өндірістің қарқынды дамуы немесе экономиканың құрылымдық жаңғыруы емес, ең алдымен жоғары базалық мөлшерлеме, қымбат несиелер, тұтынушылық сұраныстың тежелуі және теңгенің нығаюы аталады. Қарапайым тілмен айтқанда, күтіліп отырған оң нәтижелердің едәуір бөлігі экономикалық белсенділікті бәсеңдету есебінен қамтамасыз етілмек.
