Ресей Федерациясы Сыртқы істер министрлігінің ТМД елдері жөніндегі бірінші департаментінің Еуразиялық экономикалық интеграция бөлімі хабарлағандай, КҚБК (Кеден қызметтерінің біріккен коллегиясы) 52-отырысында қатысушылар биылғы жұмыстың қорытындыларын талқылап, келесі жылға арналған жоспарларды бекітті. Барлығы 26 мәселе қаралды. Басым бағыттардың бірі – Ресей Федерациясының Президенті Владимир Путиннің тапсырмасына сәйкес шекарадағы бақылау рәсімдерінің орташа уақытын 10 минутқа дейін қысқарту. Бұл мақсатқа қол жеткізу үшін автокөлік өткізу пункттеріндегі мемлекеттік бақылауды кешенді автоматтандырудың негізі ретінде алдын ала электрондық ақпаратты пайдалану тұжырымдамасы қолдау тапты. Тағы бір маңызды мәселе – Еуразиялық экономикалық одақтың экономикалық қауіпсіздігін қамтамасыз етудің негізі әрі адал бизнес үшін қолайлы жағдай қалыптастырудың ажырамас бөлігі саналатын тәуекелдерді басқару жүйесін жетілдіру. Тәуекелдерді басқару жүйесі бойынша, ең алдымен, кедендік құн мен транзитке бақылаудың тиімділігін арттыруға бағытталған шешімдер қабылданды. Сонымен қатар, тауарларды жіктеу және тәуекелдер бойынша жұмыс топтарының өзара іс-қимыл тәсілдері келісілді. Мәселелердің жеке бір бөлігі тауарларды жіктеудің бірізділігін қамтамасыз етуге арналды. Электрондық сауда көлемінің өсуіне байланысты халықаралық пошта жөнелтілімдері арқылы жіберілетін тауарларға кедендік бақылау жүргізу тәжірибесі бойынша, қашықтықтан тексеру жабдықтарын пайдалану арқылы жүйелі тәжірибе алмасуды жалғастыру туралы шешім қабылданды.
Евразия24 пікірі:
Біздің ойымызга, қол жеткізілген нәтижелерді кедендік рәсімдерді жеңілдету емес, бақылау жүйесінің құрылымын қайта қалыптастыру ретінде қарастырған дұрыс. Қосымша шарттарсыз-ақ жүйе біртіндеп цифрлық форматқа көшіп, тәуекелге негізделген және таңдамалы сипат ала бастады. Бұл бизнес үшін кеден саласындағы рәсімдердің өзгеріп жатқанын көрсететін нақты белгі. Алайда жүк тасымалын шын мәнінде жеңілдету үшін аталған өзгерістер Еуразиялық экономикалық одаққа мүше барлық мемлекеттерде міндетті түрде толық енгізілуі тиіс. Олар тек сынақ режимімен шектелмеуі қажет. Сонымен қатар шекарадағы тексеру уақытының нақты қысқарғанын, кідірістер мен артық әуре-сарсаңға байланысты шағымдардың азайғанын дәлелдейтін ресми деректер қалыптасуы маңызды. Жалпы алғанда, нақты мақсатты көрсеткіштердің белгіленуі — оң қадам. Ал тауарларды жіктеуде ортақ тәртіпті қамтамасыз етуге бағытталған жұмыс алдағы уақытта елеулі нәтиже беруі мүмкін. Дегенмен қазіргі кезеңде нақты жетістіктерден гөрі болашаққа қатысты жоспарлар мен ниеттер басым екенін байқаймыз.
