ҰҚШҰ хабарлайды. 2025 жылға арналған Ұжымдық қауіпсіздік жүйесінің басқару органдары мен күш-құралдарын бірлесіп даярлау жоспарына сәйкес, 29 қыркүйек пен 3 қазан аралығында Қазақстан Республикасы Ұлттық ұланының полигонында ОДКБ құрамындағы арнайы мақсаттағы бөлімшелердің қатысуымен «Кобальт-2025» атты арнайы оқу-жаттығу өткізілді. Іс-шараға ішкі істер органдары, ұлттық қауіпсіздік құрылымдары, Ұлттық ұлан, арнайы және есірткіге қарсы қызметтер, сондай-ақ апаттық-құтқару және өртке қарсы қызметтердің бөлімшелері қатысты. Оқу-жаттығу Ұжымдық жедел әрекет ету күштерінің құрамындағы арнайы мақсаттағы бөлімшелердің өзара іс-қимылын үйлестіру, күрделі қауіп-қатерлерге бірлесіп ден қою, дағдарыстық жағдайларда жедел әрекет ету дағдыларын жетілдіру мақсатында ұйымдастырылды. ОДКБ құрамындағы елдердің арнайы мақсаттағы бөлімшелері әскери жағдайға барынша жақын ортада жеке арнайы операция жүргізу барысында өз шеберліктерін шыңдады. Сонымен қатар, Ұжымдық қауіпсіздік туралы шарт ұйымы мемлекеттерінің өкілдерінен құралған жедел штаб операцияны жоспарлау, оны жүргізу жөнінде шешім қабылдау және бөлімшелердің іс-қимылын үйлестіру мәселелерін пысықтады.
Евразия24 пікірі:
Күні кеше Қазақстан, Ресей, Беларусь, Армения, Тәжікстан және Қырғызстан елдерінің арнайы мақсаттағы бөлімшелері бірлескен контртеррористік және құтқару операцияларын сәтті өткізді. Әскери жаттығу болғанымен, бұл іс-шаралар шынайы жағдайға барынша жақын ұйымдастырылды. Ұжымдық қауіпсіздік туралы шарт ұйымы (ОДКБ) аясында ұжымдық арнайы жасақтың әскери дайындық деңгейін жоғары ұстау – тұрақты дәстүр. Мұндай жаттығулар бөлімшелердің үйлесімділігін арттырып, бірлескен іс-қимыл дағдыларын шыңдауға мүмкіндік береді. 2025 жылғы оқу-жаттығуларының ерекшелігі өткен жылы қатысудан бас тартқан Арменияның қауіпсіздік құрылымдары да қайта қосылуы.
ОДКБ Бас хатшысының орынбасары Валерий Семериков жаттығулардың сапалы ұйымдастырылғанын атап өтіп, Қазақстан тарапына жоғары баға берді. Ол жедел штабтың үйлесімді әрі жедел жұмысын, сондай-ақ жаттығуға қатысушы бөлімшелердің кәсіби және әскери дайындығының жоғары деңгейін ерекше атап өтті.
