Brief Мир басылымы Bloomberg агенттігіне сілтеме жасай отырып хабарлайды: Қазақстан мұнайының сыртқы нарықтарға жеткізілуі уақытша шектеулерге тап болуы мүмкін. Бұған Қара теңіздегі Каспий құбыр консорциумының (КҚК) теңіз терминалында шварттық құрылғылардың бірінің жоспарлы жөндеуден өтуі және екіншісінің дрон шабуылы салдарынан істен шығуы себеп болып отыр. Қазіргі уақытта үш айлақ жабдығының тек біреуі ғана жұмыс істеп тұр. Толық экспорт көлемін қамтамасыз ету үшін терминалда кемінде екі шварттық құрылғының бір мезгілде жұмыс істеуі қажет. Осы шектеулердің салдарынан қоймаларда мұнай қоры жинала бастаған. Егер жағдай өзгермесе, сақтау қуаттылықтары толып, Қазақстан мұнай өндіру көлемін қысқартуға мәжбүр болуы мүмкін.
Евразия24 пікірі:
Сарапшылардың айтуынша, қазіргі жағдайда «ҚазТрансОйл» АҚ экспорттық мұнай тасымалын жедел түрде балама бағыттарға қайта бағдарлаған. «Қазақстанның мұнай және газы» басылымының хабарлауынша, компания таратқан ресми мәлімдемеде: «Халықаралық серіктестер мен жөнелтуші тараптармен келіссөздер уақтылы ұйымдастырылғанының арқасында Каспий құбыр консорциумы (КҚК) жүйесі арқылы өтетін халықаралық мұнай ағындарын Самара бағытына, Баку – Тбилиси – Жейхан (БТД) бағытына, сондай-ақ Қытай нарығына қайта бағыттау мүмкіндігі келісілді», – делінген. Аталған мәліметке сәйкес, бастапқы жоспармен салыстырғанда Қазақстанда 2025 жылғы желтоқсан айында экспорт көлемі нақты өсім көрсетіп отыр: Атырау – Самара бағыты бойынша – 232 мың тоннаға, Қытайға – 72 мың тоннаға, Ақтау порты арқылы (БТД бағытына) – 58 мың тоннаға артқан. Сонымен қатар, желтоқсан айында «ҚазТрансОйл» мұнай өндіруші компанияларға мұнайды уақытша сақтауға арналған резервуарлық паркін ұсынатынын хабарлады. Бұл шара жөнелту кестелерінің икемділігін қамтамасыз етуге, тасмымалдау процессін оңтайландыруға және магистральдық мұнай құбырлары жүйесі арқылы тасымалды үздіксіз жүргізуге мүмкіндік береді. Осылайша, шварттық құрылғыны қалпына келтіру жұмыстарының шамамен 15 желтоқсанда аяқталуы күтіліп отырған жағдайда, Қазақстан тарапы жағдайды тұрақты бақылауда ұстап, жоспарлы жұмыстардың аяқталуын аса қажеттіліксіз шұғыл шараларға жүгінбей-ақ күтуге мүмкіндігі бар.
