Астана. 10 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «1992 жылғы Трансшекаралық су ағындары мен халықаралық көлдерді қорғау және пайдалану туралы конвенцияға Су және денсаулық мәселелері жөніндегі хаттаманы ратификациялау туралы» заңға қол қойды. Бұл туралы сәрсенбі күні мемлекет басшысының баспасөз қызметі хабарлады.
Аталған құжат су ресурстарын орнықты басқару, сондай-ақ суға байланысты аурулардың алдын алу және олардың таралу ауқымын шектеу арқылы халықтың денсаулығы мен әл-ауқатын қорғауға бағытталған.
Хаттаманың қолданылу аясы жерүсті тұщы суларына, жерасты суларына, эстуарийлерге, аквакультурада пайдаланылатын жағалаудағы суларға, ашық су айдындарында шомылуға арналған тұйық суларға, су алу, тасымалдау, тазарту немесе сумен жабдықтау процесіндегі суларға, сондай-ақ ағынды суларға таралады.
Қатысушы елдердің негізгі міндеттемелеріне сумен жабдықтау, санитария, гигиена және денсаулық сақтау салаларында нақты әрі өлшенетін мақсатты көрсеткіштерді белгілеу; суға байланысты ауруларды қадағалау және ерте ескерту жүйелерін құру және жетілдіру; қажетті ресурстармен қамтамасыз етілген төтенше жағдайлар кезіндегі іс-қимыл жоспарларын әзірлеу; халықты қолданыстағы санитарлық-гигиеналық талаптарға сай сумен қамтамасыз ету мақсатында ведомствоаралық өзара іс-қимылды күшейту жатады.
Хаттамаға қосылу арқылы Қазақстан қауіпсіз ауыз суды дайындау және жеткізу, сондай-ақ ағынды суларды кәдеге жарату және қайта пайдалану саласындағы озық технологиялар мен білімге қол жеткізеді. Сонымен қатар бірлескен қадағалау және ерте ескерту жүйелерін, төтенше жағдайларға арналған іс-қимыл жоспарларын әзірлеуге қатысу мүмкіндігіне ие болады.
