Астана. 10 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Түрікменстанның тұрақты бейтараптығының 30 жылдығына, Халықаралық бейбітшілік пен сенім жылына және Халықаралық бейтараптық күніне арналған форумға қатысады. Бұл туралы сәрсенбі күні мемлекет басшысының баспасөз қызметі хабарлады.
«Мемлекет басшысы Қасым-Жомарт Тоқаев 11–12 желтоқсан күндері Ашхабад қаласына барып, Халықаралық бейбітшілік пен сенім жылына, Халықаралық бейтараптық күніне және Түрікменстанның тұрақты бейтараптығының 30 жылдығына арналған форум жұмысына қатысады», – делінген баспасөз қызметі таратқан хабарламада.
Бұған дейін хабарланғандай, шет мемлекеттердің бірқатар басшылары мен ірі халықаралық ұйымдардың жетекшілері қатысатын халықаралық форум 12 желтоқсанда Ашхабадта өтеді.
