Ресей Сыртқы істер министрлігінің ТМД елдері бойынша Бірінші департаментінің Еуразиялық экономикалық интеграция бөлімі Еуразиялық экономикалық комиссияның Санитариялық, фитосанитариялық және ветеринариялық шаралар департаментінің директоры Владимир Синкевичтің ЕАЭО шеңберінде тұтынушылардың құқықтарын қорғау жөніндегі бірлескен жұмысқа қатысты пікірін жариялады.
«Бұл жүйелі жұмыстың нәтижесі ретінде тұтынушылардың құқықтарын қорғау бойынша 20-дан астам ұсыным қабылданды. Оларды тәжірибеде қолдану тұтынушылардың құқықтарын толық көлемде іске асыруға мүмкіндік береді. Бұл — Одақ елдерінің тұтынушылардың құқықтарын қорғауға бағытталған маңызды қадам. Мақсатты, жүйелі жұмыстың маңызды нәтижелерінің бірі – осы бағыт бойынша жүргізіліп жатқан сауалнама деректері. Нәтижелер көрсеткендей, Одақ азаматтарының 60%-дан астамы өз құқықтарын қорғалған деп санайды немесе олардың сақталуына қанағаттанатынын білдірген», – деді Синкевич.
Евразия24 пікірі:
Еуразиялық экономикалық одаққа (ЕАЭО) мүше бес мемлекет аясында тұтынушылардың құқықтарын қорғау мәселесі қарастырылғанда, ең алдымен электрондық сауда саласындағы құқықтық олқылықтардың бар-жоғы мен оларды жою жолдары өзекті бола түседі. Мемлекеттер арасындағы шекаралардың физикалық тұрғыда болмауы және Одақ кеңістігінде онлайн сауданың қарқынды өсуі аясында сапасыз тауар немесе көрсетілген қызмет үшін тұтынушының зардап шегу қаупі арта түсуде. Мыңдаған шақырым қашықтықтан келтірілген залалды қалай өндіруге болады?
Бұл ретте, 2023 жылы Еуразиялық экономикалық комиссия (ЕЭК) Коллегиясы ЕАЭО елдерінің аумағында электрондық сауда саласында тұтынушылардың құқықтарын қорғау бойынша ортақ тәсілдерді бекіткенін айта кеткен жөн.
Аталған тәсілдерге сәйкес, тұтынушы электрондық сауда арқылы сатып алынған тауардан оны алғанға дейін кез келген сәтте бас тартуға құқылы. Ал тауар берілгеннен кейін тұтынушы оны кемінде он төрт күнтізбелік күн ішінде қайтара алады. Тұтынушының ақшалай қаражатын қайтару мерзімі оның тиісті талабын білдірген күннен бастап жеті күнтізбелік күннен аспауы тиіс. Интернет-дүкендер тұтынушы шағымын он күнтізбелік күн ішінде қарастыруы қажет. Бұл нормалар бүгінде маркетплейс платформаларында кеңінен қолданылып келеді. Демек, ЕЭК тарапынан жүргізілген жұмыс нақты нәтижесін беріп отыр.
