Өткен аптаның соңында Еуразиялық экономикалық комиссияның Кеңесі еуразиялық экономикалық интеграция аясында бірқатар маңызды шешімдер қабылдады. Атап айтқанда, натрий сульфидтері мен целлюлоза эфирлеріне қатысты импорттық кедендік баж мөлшерлемелерін нөлдік деңгейде белгілеу туралы шешім қабылданды. «Кедендік-тарифтік реттеудің бұл шаралары дайын өнімнің өзіндік құнын төмендетіп, ішкі және сыртқы нарықтардағы бәсекеге қабілеттілігін арттыруға мүмкіндік береді», – делінген құжатта. Сондай-ақ ЕЭК Кеңесі фармацевтикалық инспекция жүргізу қағидаларын бекітті. Олар дәрілік заттардың тиісті зертханалық тәжірибе талаптарына сәйкестігін бағалайды. «Бұл бір препаратты ЕАЭО елдерінде тіркеу барысында қайта сараптамадан өткізудің алдын алады», – деп көрсетілген. Сонымен қатар, Еуразиялық экономикалық одақтың тиісті клиникалық практика қағидаларының жаңа редакциясы бекітілді. «Бұл, ең алдымен, халықаралық көп орталықты зерттеулер жүргізетін ЕАЭО елдерінің (клиникалық орталықтар) нарық қатысушыларына қолдау көрсетеді. Өндірушілер шетелде дәрі-дәрмектерді тіркеу кезінде клиникалық зерттеулер нәтижелерін қайта өткізбей-ақ ұсына алады», – делінген құжатта. Бұдан бөлек, бақылау шараларына қатысты шағым беру тәртібі бекітілді. «Бұл – ЕАЭО мүше мемлекеттер арасындағы мемлекеттік бақылау нәтижесінде туындайтын даулы мәселелерді қарау мен реттеудің сотқа дейінгі жұмсақ тетігі болмақ». Соңында, ЕАЭО-да химиялық заттар мен қоспалардың бірыңғай тізілімін қалыптастыру және жүргізу тәртібі, сондай-ақ жаңа химиялық заттарды нотификациялау рәсімі мақұлданды.
Евразия24 пікірі:
Еуразиялық бестік 2014 жылы тауарлар мен қызметтердің бірыңғай нарығына көшу туралы жариялаған сәттен бастап, ЕАЭО-ның басқарушы органдары өзара рұқсат құжаттарын тану, сертификаттау және ұлттық бақылау-қадағалау органдары тарапынан қолданылатын шараларға бірыңғай тәсілдерді бекіту жөнінде стратегиялық шешімдерді дерлік апта сайын қабылдап келеді. Бірақ бұл үдеріс сырттай қарағанда ғана оңай көрінуі мүмкін — экономикалық одақ құру туралы келісімге қол қойып, бірлесе әрекет етуді мақұлдадық дегенмен, шынайы интеграция одан әлдеқайда күрделі. Өйткені ЕАЭО құрамындағы бес елдің әрқайсысы ішкі тұтыну нарығы мен өндірістік секторды — сапасыз импорт пен әділетсіз бәсекеден қорғаудың түрлі деңгейін көздейтін ұлттық заңнамаға ие. Мысалы, Қазақстан мен Ресей арасындағы ауыл шаруашылығы өнімдеріне қатысты өзара тыйымдар жыл сайын қайталанып келеді. Бұл жерде ешқандай жеке мүдде емес — тек ұлттық бизнес пен нарықты қорғау мәселесі алдыңғы орынға шығады. Осыған байланысты, шектеулерді барынша азайтып, тек ұлттық қауіпсіздікке тікелей әсер ететін шешуші тосқауылдарды ғана қалдыру мақсатында, Еуразиялық экономикалық комиссия ұлттық заңнамаларды зерделеп, бақылау шараларын үйлестіру тетіктерін әзірлеуде.
Жуырда қабылданған шешімдер — осы бағыттағы жұмыстың жалғасы.
