Ақорданың хабарлауынша, Қазақстан Республикасының Президенті Қасым-Жомарт Тоқаев Еуразиялық экономикалық комиссия Алқасының Төрағасы Бақытжан Сағынтаевты қабылдады. Кездесу барысында Еуразиялық экономикалық одақтың қазіргі жағдайы мен оны одан әрі дамыту мүмкіндіктері талқыланды. Әңгіме барысында Қазақстан Республикасының 2026 жылы ЕАЭО органдарындағы төрағалығының басым бағыттарына ерекше назар аударылды. Сондай-ақ Қасым-Жомарт Тоқаев 21 желтоқсанда Санкт-Петербург қаласында өтетін Жоғары Еуразиялық экономикалық кеңестің отырысына дайындық барысы жөнінде хабардар етілді.
Евразия24 пікірі:
2026 жылы Қазақстанның ЕАЭО органдарындағы төрағалығы еліміз үшін бірқатар артықшылықтар мен жаңа мүмкіндіктерге жол ашады. Біріншіден, Қазақстан Одақтың күн тәртібін қалыптастыруға ғана емес, төраға ел ретінде басым бағыттар мен бастамаларды айқындауға, соның ішінде жаңа қағидалар мен жұмыс тәртібін әзірлеу үдерісіне ықпал ете алады. Екіншіден, ЕАЭО органдарының назарын Қазақстан экономикасы үшін маңызды басымдықтарға шоғырландыру мүмкіндігі артады. Көлік және транзит салаларын дамыту, өнеркәсіп, агроөнеркәсіп кешені мен цифрландыру бағыттары еліміз үшін өзекті болғандықтан, 2026 жылы күн тәртібінде дәл осы салалардың белсенді орын алуы ықтимал. Үшіншіден, төрағалық Қазақстанның өңірлік алаңда рөлін едәуір күшейтеді, өйткені бұл ресми мәртебе еліміздің ықпалын арттыра түседі. Жалпы алғанда, 2026 жыл Қазақстан үшін еуразиялық интеграция шеңберінде экономикалық және саяси пайда ала отырып, өз позицияларын нығайтуға мүмкіндік беретін маңызды кезең болмақ.
