«ФОКУС» еуроазиялық әлеуметтанушылар альянсының хабарлауынша, ресейліктер ТМД елдерінің ішінде Беларусь, Өзбекстан және Қазақстанды ең тұрақты, табысты және сенімді серіктестер ретінде қарастырады. Сауалнама нәтижелеріне сүйенсек, Беларусь 14 жыл қатарынан ресейліктердің пікірінше ТМД-дағы ең тұрақты әрі табысты ел болып қалуда. Биыл респонденттердің 75%-ы осы елді таңдаған. Екінші орында 47% көрсеткішпен Қазақстан тұр. Одан кейінгі орындарда Өзбекстан (17%), Грузия (13%), Армения (10%) және Әзербайжан (10%) орналасқан. Халықаралық аренадағы Ресейдің ең сенімді серіктесі туралы сауалда да жағдай ұқсас: Беларусь 83% дауыспен көш бастап тұрса, Қазақстан үшін сауалнамаға қатысқандардың төрттен бірі (25%), ал Өзбекстанға 12%-ы дауыс берген. Қазақстан өлшенген екі көрсеткіш бойынша да екінші позицияны иеленіп отыр. Дегенмен, елдің табыстылығы мен тұрақтылығына (47%) жоғары баға берілгенімен, экономикалық жетістіктерді мойындау мен серіктестіктің болжамдылығын бағалау арасында үлкен алшақтық байқалады. Бүгінгі таңда Қазақстанды сенімді серіктес ретінде респонденттердің тек 24%-ы ғана қабылдайды, бұл көрсеткіш 2016 жылмен салыстырғанда екі еседен астам төмендегенін көрсетеді.
Еуразия24 пікірі:
Қазақстан бойынша зерттеу көрсеткіштері сырт көзге елдің дағдарысқа ұшырамайтын, тұрақты өсім көрсететін және қазіргі геосаяси жағдайда жалпы алғанда болжамды экономика ретінде орнығып келе жатқанын білдіреді. 47% көрсеткіші Беларусь елін қоспағанда, ТМД елдерінің басым бөлігінен айтарлықтай жоғары. Дегенмен, Қазақстан Ресеймен одақтас мемлекет құрған жоқ. Біздің ойымызша, «табыстылық» (47%) пен «сенімділік» (24%) көрсеткіштері арасындағы алшақтықты біржақты теріс фактор ретінде бағалауға болмайды. Бұл көбіне Қазақстанның сыртқы саясатының ерекшелігін көрсетеді. Ел Ресей, Қытай және ұжымдық Батыс сияқты түрлі ықпал орталықтарының арасында тепе-теңдік сақтауға тырысып, бір бағытқа толық тәуелді болмай келеді. Мұндай жағдайда барлық тараптан жоғары оң баға алу мүмкін емес. Айта кету керек, 2016 жылдан бері «сенімділік» көрсеткішінің төмендеуі де осы үрдіске сәйкес келеді. Бұл геосаяси ахуалдың елеулі өзгеруімен және одақтастық мәселелеріне қатысты сезімталдықтың артуымен байланысты. Қазіргі жағдайда делдалдық ұстанымнан гөрі нақты позицияға сұраныс жоғары. Алайда бұл Қазақстанның көпполярлы әлем қағидаттарына және тәуелсіз сыртқы саясатқа бейілділігін өзгертпейді.
