Елімізге танымал тұлғалардың қоғамдағы мінез-құлқына қатысты жағымсыз жағдайлар әлі де кездеседі. Жуырда бокстан Олимпиада чемпионы Данияр Елеусінов Астана көшелерінде мас күйінде көлік басқарғаны үшін жауапкершілікке тартылды.
Ол өзінің Toyota Land Cruiser автокөлігімен үш жол-көлік оқиғасын жасаған. Алдымен жерасты автотұрағы қақпасының тірегін соққан, кейін екі автокөлікпен соқтығысқан. Соққының салдарынан Kia Sportage көлігі Toyota Hilux автокөлігіне барып соғылған. Оқиғалардың нәтижесінде көліктерге материалдық залал келтірілген.
Медициналық куәландыру нәтижесінде жүргізушінің мас күйінде болғаны анықталды. Жүргізушіге қатысты Әкімшілік құқық бұзушылық туралы кодекстің 608-бабының 3-бөлігі бойынша әкімшілік іс қозғалды. Сот Данияр Елеусіновке 20 тәулік әкімшілік қамаққа алу және көлік құралын басқару құқығынан жеті жылға айыру жазасын тағайындады.
Оқиғаға қатысты бейнежазба да әлеуметтік желілерде жарияланды.
Айта кету керек, қоғамға танымал тұлғалардың заң талаптарын бұзуы сияқты жағдайлар бұған дейін де орын алған.
2023 жылдың жазында қазақстандық эстрада әншісі Төреғали Төреәлі Алматыда бірнеше құқық бұзушылық жасаған. Ол есірткілік масаң күйде көлік жүргізіп, жол қозғалысына қатысушыларға агрессия танытқан, ал ұсталған кезде полиция қызметкерлеріне қарсылық көрсетіп, балағат сөздер айтқан. Сот оған 20 тәулік әкімшілік қамаққа алу жазасын тағайындап, көлік құралын басқару құқығынан жеті жылға айырды. Кейін билік өкілдерін қорлағаны үшін қоғамдық жұмыстарға тартылды.
Сол 2023 жылы бокстан әлемнің бұрынғы чемпионы Бейбіт Шүменов те ел назарын спорттық жетістігімен емес, құқықтық оқиғамен аударды. Астанадағы сауда-ойын-сауық орталықтарының бірінде ол қолында баласы бар ер адамды көпшіліктің көзінше соққыға жыққан. Бұл оқиға әлеуметтік желілерде кеңінен талқыланып, құқық қорғау органдарының істі бастапқы кезеңде тіркеуге асықпауы қоғамның сынына ұшырады. Кейін Бейбіт Шүменовке бұзақылық бабы бойынша айып тағылғанымен, іс 2024 жылдың мамырында тоқтатылып, қылмыстық жауапкершілікке тартылған жоқ.
2024 жылдың шілде айында қазақстандық әнші Қайрат Нұртас ұшақ бортында досы Асылбек Бекқайыровпен жанжалдасып, төбелес шығарған. Сот екеуін де ұсақ бұзақылық жасағаны үшін әкімшілік жауапкершілікке тартты. Қайрат Нұртас 15 тәулікке, ал Асылбек Бекқайыров 10 тәулікке әкімшілік қамаққа алынды.
Бүгінде Олимпиада чемпионы атағы немесе елге танымал болу заң алдында артықшылық бермейтінін осындай оқиғалар айқын көрсетіп отыр. Соңғы жылдары соттар құқық бұзушылыққа жол берген тұлғалардың қоғамдағы мәртебесіне қарамастан, заң талаптарын бірдей қолдануға ұмтылып келеді. Сондықтан танымал спортшылар мен өнер адамдары үшін қоғамдық жауапкершілік пен құқықтық мәдениетті сақтау бұрынғыдан да маңызды.
