KazTAG агенттігінің хабарлауынша, Әл-Фараби даңғылында болған қоғамда үлкен резонанс тудырған жол-көлік оқиғасына кінәлі Александр Пак 10 жылға бас бостандығынан айырылды. Бұл туралы Алматы соттарының баспасөз қызметі мәлімдеді. «Алматы қаласының қылмыстық істер жөніндегі мамандандырылған ауданаралық соты Қылмыстық кодекстің 345-1-бабының 4-бөлігі бойынша (автокөлікті алкогольдік масаң күйде басқарып, жол қозғалысы ережелерін бұзу салдарынан абайсызда үш адамның өліміне әкеп соқтырған әрекет) П.-ға қатысты қылмыстық істі қарады. (…) Оқиғаның ауыр салдарын және жол қозғалысы ережелерін өрескел бұзу фактісін ескере отырып, сот П.-ға ең қатаң жаза ретінде 10 жыл мерзімге бас бостандығынан айыру жазасын тағайындауды қажет деп тапты. Сонымен қатар, ол өмір бойына көлік құралын басқару құқығынан айырылды», – делінген дүйсенбі күні таратылған хабарламада. Сот материалдарына сәйкес, наурыз айында сотталушы алкогольдік масаң күйде көлік жүргізіп, белгіленген жылдамдықты едәуір асырған. Кейін ол көлікті басқара алмай, қарсы бағыттағы жолаққа шығып кетіп, жәбірленуші басқарған автокөлікпен соқтығысқан. Жол-көлік оқиғасы салдарынан екінші көліктің жүргізушісі мен оның екі жолаушысы оқиға орнында қаза тапқан.
Еуразия24 пікірі:
2026 жылдың наурызында Алматыдағы Әл-Фараби даңғылында үш адамның өмірін қиған жол апатына қатысты қоғамда түрлі болжамдар айтылған еді. Кейбіреулер Александр Пак қатаң жазадан құтылып кетуі мүмкін деп санаған. Алайда соттың шешімі бұл жорамалдардың орынсыз екенін көрсетті. Жылдамдықты өрескел асырып, мас күйінде көлік жүргізудің соңы қайғылы оқиғаға ұласқан жағдайда кінәлілерге ешқандай жеңілдік болмайтынын сот тағы бір мәрте айқын аңғартты. Кінәсін мойындауы, өкініш білдіруі, көлікті басқара алмай қалғаны жөніндегі уәждері, тіпті қаза болғандардың туыстарының кешірімі де жүргізушінің жазасын жеңілдетуге негіз болмады. Неліктен Александр Пакқа ең қатаң жаза тағайындалды? Өйткені мұндай істерде мәселе тек жол апатына кінәлі адам мен жәбірленуші тараптың арасындағы қарым-қатынаспен шектелмейді. Бұл жерде сөз қоғамдық қауіпсіздік туралы болып отыр. Мас күйінде рөлге отырып, жылдамдықты айтарлықтай асырып, қарсы бағытқа шығып кетудің салдарынан үш адам қаза тапқан жағдайда сот тек айыпталушының жеке басына ғана емес, оның әрекетінің қоғамға төндірген қатеріне де баға береді. Бұл үкімнен әлі жауапқа тартылмаған мас күйінде көлік жүргізушілер сабақ ала ма? Бұған үміттенуге болады, бірақ нақты сенім айту қиын. Өйткені алкогольдің әсеріндегі адам ақылға емес, көңіл-күйге көбірек ерік береді. Сондықтан мұндай сәтте біреудің қатаң жазаға тартылғанын еске алып отыру екіталай.
