Мұндай жағдай бұрын-соңды болмаған деуге келмейді. Алайда қатыгездікке қатысты бірнеше оқиғаның қатарынан тіркелуі еріксіз ойландырады. Алдымен көшедегі адамдар жалаңаяқ, қолы байланған әйелге көмектессе, артынша қаланың басқа ауданында тұрғындар итті иесінің қатыгез әрекетінен арашалап қалды.
Енді әр оқиғаға жеке тоқталайық.
«Қазақстанда ер адам өз анасын байлап қойып, жазалап отырған. Жәбірленушіні көшеде Елдар Семейғазынов кездейсоқ байқап қалған. Оның айтуынша, әйел жалаңаяқ жүрген, қолы байлаулы болған. Кейін ұлының оны өзінің отбасылық өміріне араласқаны үшін осылай «жазалағаны» белгілі болды», – деп жазады CMN.
Екінші жағдайда ит қатыгез әрекеттің құрбаны болды. Иесі жануарды көшедегі адамдарға қарай лақтырған.
«Әлеуметтік желілерде Алматыда өтіп бара жатқан адаммен жанжалдасқан әйелдің итке қатыгездік көрсеткен сәті түсірілген видео тарады. Оқиғадан кейін бірнеше ер адам жануарды әйелден алып, ветеринарлық клиникаға жеткізген. Видеодан әйелдің итті қарғыбауынан ұстап тұрғанын, кейін оны алдында кетіп бара жатқан ер адамға қарай лақтырғанын, артынша мойнындағы қарғыбауынан сүйрегенін көруге болады. Әлеуметтік желі қолданушыларының айтуынша, бұл әйелдің жануарға алғаш рет қатыгездік көрсетуі емес. Бұған дейін жарияланған жазбаларда оның итті ұрып, тұншықтырғаны да айтылған», – деп «Литер» газеті хабарлады.
Куәгерлер араша түсуге тырысқанда, әйел итті қаласа, өлтіріп тастайтынын айтып сес көрсеткен. Абырой болғанда, итті агрессивті әйелден алып кеткен. Енді итке қамқор болатын жаңа иесі іздестіріліп жатыр.
Екінші оқиғаға қатысты полиция да тексеру бастады.
«Бейнежазбада әйелдің көшедегі адаммен жанжалдасу кезінде қолындағы итті пайдаланғаны көрінеді. Осыған байланысты оқиғаға қатысушылардың жеке басы және болған жағдайдың барлық мән-жайы, соның ішінде жануарға қатысты әрекеттер анықталып жатыр. Тексеру қорытындысы бойынша әйелдің әрекетіне құқықтық баға беріліп, тиісті процестік шешім қабылданады», – деп «Литер» газеті Алматы қаласы Полиция департаментінің баспасөз қызметіне сілтеме жасайды.
Әрине, кейбір алматылықтарға күз «әсер ете бастады» деп кесіп айта алмаймыз. Мұндай оқиғалар бұрын да аз болмаған шығар. Тек кейінгі кезде әлеуметтік желілердің арқасында олар көп ұзамай жұрт назарына ілігіп жүр. Дегенмен қатыгез мінез-құлық байқатқан адамдарға дәрігерлер мен полицияның дер кезінде назар аударғаны жөн. Біз сөз еткен екі жағдайда да адам шығыны болған жоқ. Бірақ жағдайды қайғылы салдарға дейін жеткізудің қажеті бар ма?
