Көкшетауда жүргізуші куәлігі мен көлік жүргізу тәжірибесі жоқ әйелдің жалғызбасты ананы қағып кетуі салдарынан оның қаза болуына байланысты қозғалған іс қоғамда кеңінен талқыланған болатын. Осы іс бойынша Көкшетау қалалық соты айыпталушыға жазаны 3 жылға кейінге қалдыра отырып, 2,5 жыл мерзімге бас бостандығынан айыру жазасын тағайындады.
Алайда жүргізуші куәлігі мен көлік жүргізу тәжірибесі жоқ адамға көлік құралын басқаруға берген автокөлік иесіне қатысты қылмыстық іс жеке өндіріске бөлінгенімен, сотқа жолданбады.
«Ақмола облысы Полиция департаментінің мәліметінше, автокөлік иесіне қатысты қылмыстық іс Қылмыстық кодекстің 349-бабының 3-бөлігі бойынша жеке өндіріске бөлініп, сотқа дейінгі тергеп-тексеру жүргізілді. Тергеу қорытындысы бойынша рақымшылық жасау туралы актінің қолданылуына байланысты іс жүргізу тоқтатылды», – деп жазады Halyqstan.
Біздіңше, бұл қайғылы оқиғаның алғышарты жол-көлік оқиғасының өзінен бұрын қалыптасты. Өйткені автокөлік иесі көлік құралын жүргізуші куәлігі мен көлік жүргізу тәжірибесі жоқ адамға басқаруға берген.
Полиция бұл жайтты формальді мән-жай ретінде емес, автокөлік иесін қылмыстық жауаптылыққа тартуға негіз болған әрекет ретінде бағалағаны байқалады. Алайда іс рақымшылық жасау туралы акт қолданылған кезеңде қаралып, соның нәтижесінде жол-көлік оқиғасына кінәлі жүргізушінің жұбайы қылмыстық жауаптылықтан босатылды. Бұл ретте рақымшылықтың қолданылуы оның әрекетінде қылмыс құрамының болмағанын білдірмейді.
Мұндай шешімнің жәбірленуші тарапқа қатысты әділдігі әртүрлі бағалануы мүмкін. Дегенмен бұл жағдайда шешім қолданыстағы заңнама талаптарына сәйкес қабылданды.
