Алайда бұл төрт адамнан бөлек, сексуалдық қызмет көрсетуді ұйымдастыруға және өзге де заңсыз әрекеттерге тағы 11 адам көмектескен.
«Астанада притон ұйымдастырды, оның ішінде кәмелетке толмағандарды да осы іске тартты деп айыпталған ұйымдасқан қылмыстық топтың 15 мүшесіне қатысты қылмыстық істі тергеу аяқталды. Тергеу барысында 2023–2025 жылдары апалы-сіңлілі екі әйел жұбайларымен бірге тұрғын үй кешендеріндегі пәтерлерде сексуалдық қызмет көрсетуге арналған притон ұйымдастырғаны анықталды. Ұйымдасқан қылмыстық топ құрамында күзетшілер, әкімшілер, сондай-ақ әлеуметтік желілер мен мессенджерлер арқылы қызметті жарнамалаумен айналысқан адамдар болған. Ұйымдастырушылар қыздарды қаладағы түнгі клубтардан іздеп, оларға жоғары табыс, тұратын орын, қауіпсіздік пен құпиялылықты уәде еткен. Бұдан бөлек, қылмыстық топ мүшелері клиенттердің мас күйін пайдаланып, оларға күш қолданған, ақша бопсалаған және жалдамалы пәтерлерде заңсыз ұстап отырған», – деп ҚазТАГ хабарлады .
15 адамның барлығы қамауда немесе үйқамақта отыр. Қылмыстық іс сотқа жолданды.
Жарияланымның мазмұнына сүйенсек, ақылы интимдік қызмет көрсетуге кәмелетке толмағандар да тартылған, ал қыздарды түнгі клубтардан іздеген. Алайда бір нәрсе түсініксіз: Қазақстанда кәмелетке толмағандардың сағат 22:00-ден 06:00-ге дейін ойын-сауық орындарында болуына тыйым салынған. Сонда кәмелетке толмаған қыздар түнгі клубтарға қалай кірген?
Егер ҚазТАГ сілтеме жасаған прокуратура хабарламасында ұйымдасқан қылмыстық топ мүшелері ретінде көрсетілген «әкімшілер» дегенде дәл осы ойын-сауық орындарының қызметкерлері айтылып отырса, мәселе түсінікті. Ал олардың арасында мұндай мекемелердің өкілдері болмаса немесе олар мүлде жауапқа тартылмаса, онда тағы бір сұрақ туындайды: заңды өкілдерінсіз балалардың түнгі уақытта ойын-сауық орындарында болуына жол берген мекемелердің жауапкершілігін көздейтін Әкімшілік құқық бұзушылық туралы кодекстің 132-бабы қалай қолданылды?
Қалай болғанда да, сот үкімімен танысу қызық болмақ. Дегенмен іске кәмелетке толмағандардың қатысы барын ескерсек, сот отырысы жабық өтуі де мүмкін.
