ҚР Үкіметі хабарлайды: «Қазақстандағы егін жинау науқанының қорытындылары қаралғаннан кейін Премьер-Министр салалық министрліктер мен облыстардың әкімдіктеріне бірқатар тапсырма берді. Атап айтқанда, Ауыл шаруашылығы министрлігіне облыс әкімдіктерімен бірлесіп, жаңа өнімді элеваторларға уақтылы қабылдау мен кептіру жұмыстарын қамтамасыз ету тапсырылды. Астықты сақтау инфрақұрылымы толық қуатта пайдаланылуы тиіс. Өнімді, соның ішінде жеміс-көкөніс өнімдерін сақтау қызметтеріне негізсіз баға өсіміне жол берілмеуі қажет. Бұл бағыттағы жұмыстарда қажет болған жағдайда бәсекелестікті қорғау және дамыту агенттігінің ресурстары пайдаланылуы тиіс. Көлік министрлігіне «ҚТЖ» ҰК» АҚ-мен бірлесіп, өнімді шығару үшін жеткілікті көлемде астық тасығыш вагондар мен жүк автокөліктерін қамтамасыз ету тапсырылды. Ауыл шаруашылығы министрлігімен тығыз үйлесімді жұмысты қамтамасыз ету, егін жинау және өнімді тасымалдау кестелерін өзара сәйкестендіру қажет. Астықты жаппай жинау кезеңінде азық-түлік тауарларының қорын қалыптастыру маңызды. Өңір әкімдіктеріне — қыркүйек айының соңына дейін негізгі көкөніс түрлерін жеткізуге қажетті көлемде шарт жасасуды қамтамасыз ету тапсырылды. Сауда министрлігіне — ауыл шаруашылығы өнімдерінің бағасын қалыптастыру тізбегіне тиімсіз делдалдардың кіруіне жол бермеу бойынша шаралар қабылдау және өнімді шаруалар үшін әділ талаптармен өткізу жұмыстарын ұйымдастыру жүктелді. Сонымен қатар, әлеуметтік маңызы бар азық-түлік бағасының негізсіз өсуіне жол бермеу міндеті қойылды. Сауда министрлігіне әкімдіктермен бірлесіп — баға қалыптастыру үдерісін реттеуге арналған барлық қолда бар тетіктерді іске қосып, қатаң бақылау орнату тапсырылды.
Евразия24 пікірі:
Күзгі дала жұмыстарының қорытындысы бойынша өткен Үкімет отырысында ауыл шаруашылығы өнімдеріндегі баға қалыптастыру мәселесі негізгі талқылау тақырыптарының біріне айналды. Себебі «егістен – сөреге дейінгі» логистикалық тізбекте ондаған делдал жылдар бойы бекем орнығып, ешқандай қосымша құн өндірмей-ақ пайда көріп келеді. Елімізде бұл мәселе бұрыннан белгілі. Мемлекет басшысы фермерлер мен тұтынушылар арасындағы тиімсіз делдалдар тізбегін қысқарту жөнінде бірнеше рет нақты тапсырма берген. Соған қарамастан, Ауыл шаруашылығы министрі Айдарбек Сапаров үш күндік жұмыс сапары барысында сиыр етінің сатып алу бағасы 3 200 теңге болып, ал сауда желілерінде 3 800 теңгеге өткені жөнінде жаңа ақпарат алғандай таңданыс білдірді. «Сағатына әр келі үшін 600 теңгеден пайда көреді». Ауыл шаруашылығы өндірушілерінің салалық қауымдастықтарына, бәлкім, Ауыл шаруашылығы және Сауда министрліктерінің басшылығына фермерлердің өнімін сауда желілері мен базарларға тікелей өткізулеріне аймақтарда бейресми тосқауыл барын ескерткен жөн болар. Бұл – жылдар бойы қалыптасқан делдалдық жүйенің бұзылмауы үшін жасалған келісімдер. Қазақстан тарихында ірі сауда орындарының сөрелеріне шығу құқығы үшін фермерлердің сотқа жүгінген жағдайлары да болған. Демек, бұл салада Үкіметтің атқарар жұмысы әлі де ауқымды.
