Ұлттық экономика министрлігінің мәліметінше, 2025 жылғы 15 шілдеде халықаралық Fitch Ratings агенттігі Қазақстан Республикасының егемендік кредиттік рейтингін «BBB» деңгейінде растады. Болжам бойынша рейтинг алдағы уақытта өзгермейді.
Агенттік хабарлауынша, рейтингтің осы деңгейде сақталуына ықпал еткен негізгі факторлар қатарында Қазақстанның таза сыртқы активтерінің жоғары болуы, оның ішінде Ұлттық қордың валюталық активтері мен Ұлттықбанктің алтын-валюта резервтері, мемлекеттік қарыз деңгейінің төмендігі, бюджеттік саясатты біртіндеп оңтайландыру, қаржыландырудағы икемділік, экономиканың тұрақты өсу қарқыны мен геосаяси тәуекелдердің салыстырмалы түрде қалыпты болуы аталды.
Сондай-ақ, Теңіз кен орнын кеңейту (ТШО) есебінен мұнай өндіру көлемінің артуы мұнай бағасының төмендеуі салдарын айтарлықтай өтейтіні атап өтілді.
Евразия24 пікірі:
Fitch Ratings халықаралық рейтинг агенттігі жариялаған есебінде АҚШ тарапынан енгізілген 25 пайыздық импорттық баж салығы Қазақстан экономикасына айтарлықтай әсер етпейді деген тұжырым жасалған. Себебі, АҚШ-тың Қазақстанның жалпы сыртқы сауда құрылымындағы үлесі мардымсыз.
Агенттік сонымен қатар ел үшін екінші ретті санкциялар қаупі төменекенін де атап өтеді. Бұл – нарықтық тұрақтылық үшін оң фактор.
Алайда Fitch-тің келесі пайымына назар аудармай өтуге болмайды: бюджеттік және квазибюджеттік қолдаудың жалғасуы есебінен ғана Қазақстанның өңдеуші емес секторлары экономикаға тұрақты үлес қосуда. Бұл пікір еліміздің шикізаттық емес секторларының шынайы жағдайын көрсетіп отыр.
Өндіріс пен қызмет көрсету салаларының мемлекеттік қолдаусыз бәсекеге қабілетсіздігі – бұл жағдайды реанимациядағы науқастың өмірін жасанды жолмен ұстап тұрумен салыстыруға болады. Яғни мемлекет экономикадан шеттегісі келсе де, оны өмірде қалдыру үшін белсенді араласуға мәжбүр.
Осылайша, қосымша құн қалыптастыру үдерісі бюджет пен мемлекеттің ерік-жігеріне тәуелді тұйық шеңбер қалыптасып отыр.
