Ақорда мәліметінше, Президент Қасым-Жомарт Тоқаев теңізге шыға алмайтын дамушы елдер жөніндегі БҰҰ-ның Түркіменстанда өтіп жатқан Үшінші конференциясында сөйлеген сөзінде былай деді: «Біз теңізге шығатын жолы жоқ қазіргі жағдайдан құрлық арқылы байланыс маңызды рөл атқаратын болашаққа қарай бет алудамыз. Біздің өңір әлеуметтік-экономикалық дамуда тұрақтылық танытып отыр және саяси ерік-жігердің, стратегиялық инвестициялардың және халықаралық серіктестіктің арқасында теңізге шығу мүмкіндігінің болмауы өсудің қуатты қозғаушы күшіне айнала алатынын көрсетіп отыр. Біз Орталық Азияның сауда, инвестиция, көлік, байланыс және ресурстарды тұрақты басқару салаларында серпінді даму әлеуеті бар, өзара тиімді іс-қимыл аймағына айналғанының куәсі болып отырмыз. Екі күн бұрын Қазақстан БҰҰ-мен бірге Алматыда Орталық Азия мен Ауғанстан үшін Тұрақты даму мақсаттары бойынша БҰҰ-ның Өңірлік орталығын құру туралы келісімге қол қойды. Бұл – бүкіл өңір үшін маңызды жетістік және Аваза іс-қимыл бағдарламасының асыл мақсаттарына толық сәйкес келеді. Қазақстан бастамасын қолдағаны үшін БҰҰ Бас хатшысына және Орталық Азиядағы барлық серіктестерімізге тағы да алғысымды білдіремін».
Евразия24 пікірі:
Соңғы уақытта Президент Қасым-Жомарт Тоқаевқа қатысты беделді тұлғалар тарапынан оң пікірлер жиі айтылуда. Жуырда Алматыда өткен кездесуде БҰҰ Бас хатшысы Антониу Гутерриш Қазақстанды «әлемдегі парасаттылық дауысы» ретінде атап, елімізге шынайы таңданысын білдірді. Оңтүстік Калифорния университетінің мемлекеттік басқару ісі жөніндегі ардагер профессоры Честер Ньюланд та zakon.kz порталына берген сұхбатында:«Тоқаев автократиядан бас тартып, мемлекетті заң үстемдігі мен халық егемендігіне негізделген азаматтық мәдениетке жетелейді. Ол – Ағартушылық дәуіріндегі көшбасшылықтың дер кезінде келген және көрнекті үлгісі» деп жоғары бағасын берді. Бұл пікірлер кездейсоқ емес. Бұл – күрделі геосаяси жағдайда Қазақстанның «түйені түгімен жұтатын» жағдайдан сытылып шығып, бір мезгілде еуразиялық ықпалдастық пен Батыспен әріптестікті теңгерімді дамытуының нәтижесіне берілген парасатты бағалар. Бұл – нағыз жоғары деңгейдегі саяси шеберлік, оны мақтаныш етуге әбден лайық.
