Ақорда хабарлайды: «Мемлекет басшысы Ұлттық қауіпсіздік комитетінің төрағасы Ермек Сағымбаевты қабылдады. Президент ведомствоның жыл басынан бергі қызметінің негізгі қорытындылары және алдағы кезеңге арналған міндеттері туралы есепті тыңдады. Ермек Сағымбаевтың мәліметінше, ұлттық қауіпсіздік органдары экстремизм мен терроризмге қатысы бар 67 адамды ұстаған. Радикалды идеологияны ұстанған 83 азамат сотталған. Ішкі істер министрлігімен бірлескен шаралардың нәтижесінде 17 қылмыстық топтың қызметіне тосқауыл қойылып, 244 қатысушы ұсталды, оның 96-сы қамауға алынған. Заңсыз айналымнан 453 қару, 64 граната және шамамен 6 мың оқ-дәрі тәркіленді. Сонымен қатар 16 есірткі зертханасы, 25 халықаралық және 19 өңірлік есірткі арнасы жойылды. Жалпы 20 тоннаға жуық есірткі заты, оның ішінде 13 тонна колумбиялық кокаин және 10 тонна прекурсор анықталып, тәркіленді. Экономикалық қауіпсіздікті қамтамасыз ету және сыбайлас жемқорлыққа қарсы іс-қимыл шеңберінде мемлекетке 3,8 трлн теңге көлемінде залалдың алдын алынып, бюджетке 255 млрд теңге қайтарылды. Коррупциялық фактілер бойынша 91 қылмыстық іс қозғалды. Кездесу қорытындысы бойынша Мемлекет басшысы ұлттық қауіпсіздік органдарының қызмет бағыттары бойынша бірқатар тапсырма берді».
Евразия24 пікірі:
Маусым айындағы қайта ұйымдастырудан кейін сыбайлас жемқорлыққа қарсы іс-қимыл агенттігінің функциялары толықтай ҰҚК-ге берілгені белгілі. Осы қадамның дұрыстығын көрсететін деректер қазір аз емес. Мәселен, агенттік таратылардың алдында өткен жедел кеңесте жарияланған мәліметке сүйенсек, 2025 жылдың алғашқы үш айында антикор органдарының өндірісінде 770 қылмыстық іс болған, оның 300-ге жуығы аяқталған, ал мемлекетке келген 15 млрд теңге залал өтелген. Әрине, бұл көрсеткіштер Ермек Сағымбаевтың Мемлекет басшысына айтқан деректерімен толық қабыспайды. Істер саны азайғандай көрінеді, бірақ бюджетке қайтарылған қаражат едәуір өскен. Айта кетейік, Асхат Жұмағали агенттікті басқарған кезде оның Президентке берген есебінде (https://www.akorda.kz/ru/glava-gosudarstva-prinyal-predsedatelya-agentstva-po-protivodeystviyu-korrupcii-ashata-zhumagali-1035242 ): 521 коррупциялық қылмыс тіркелген; 257 лауазымды тұлға әшкереленген. Оның 141-і — басшылық құрам. Сотқа 366 қылмыстық іс жолданған. Мемлекетке 15 млрд теңге өтелген. 2022 жылдан бері 1,13 трлн теңге активтер қайтарылған. Мемлекеттік сатып алуларды бақылау барысында 21,2 млрд теңгенің тиімсіз жұмсалуының жолы кесілген Бұл — 2025 жылдың тек алғашқы тоқсанындағы нәтиже. Ал жыл ортасынан бастап антикор ҰҚК құрамында жұмыс істей бастаған соң, бар болғаны алты айда бюджетке қосымша 240 млрд теңге қайтарылған. Яғни, небәрі бірнеше айда көрсеткіштің 16 есеге өскені байқалады.
