Zakon.kz хабарлауынша, білім беру саласындағы халықаралық Quacquarelli Symonds (QS) рейтингтік ұйымы студенттер үшін әлемдегі ең қолайлы әрі жайлы 150 қаланың жаңартылған тізімін жариялады. Бұл рейтингке Қазақстанның екі қаласы – Алматы мен Астана енді.Рейтингті жасаушылардың мәліметінше, бағалауға іріктеудің негізгі екі талабы бар. Біріншісі – қала халқының саны кемінде 250 мың адам болуы керек. Екіншісі – қалада QS World University Rankings жаһандық рейтингіне енген кемінде екі жоғары оқу орны болуы тиіс.
2026 жылғы рейтингте Алматы ТМД кеңістігіндегі студенттер үшін ең үздік қала атанды. Жалпы тізімде мегаполис 65,1 балл жинап, 78-орынға тұрақтады. Осылайша Алматы Дубайды (65 балл), Доханы (64,5), Вашингтонды (64,5), Атлантаны (63,7), Оттаваны (63,6), Питтсбургті (63,6), Кейптаунды (63,4), Ослоны (63,3), Валенсияны (63), Анкараны (62,1) және Тбилисиді (52,6) басып озды.
«Еуразия24» пікірінше:
Алматы мен Астананың бұл рейтингтен орын алуы заңды. Қорытынды ұпайды есептеу кезінде университеттердің деңгейі, студенттік қауымдастықтың алуан түрлілігі, қалалардың өмір сүруге және оқуға қолайлылығы, жұмыс берушілердің жастармен жұмыс істеу белсенділігі, студенттер үшін бағаның қолжетімділігі сияқты көрсеткіштер ескеріледі. Ең бастысы – студенттердің өз бағасы да назарға алынады.
Ал Астана 119-орынға жайғасқан. Жас астананың инфрақұрылымы қарқынды дамып келе жатқандықтан, оның әлеуеті әлі де жоғары.
Мұндай халықаралық рейтингтерде көріну Қазақстанның талантты жастарды, әсіресе Орталық Азия елдерінен келетін студенттерді тартудағы бәсекелік артықшылығын күшейтеді. Шетелдік студенттер саны артқан сайын білім беру қызметінің экспорты өсіп, академиялық байланыстар нығаяды әрі түлектердің бір бөлігінің Қазақстанда қалып еңбек ету ықтималдығы да артады.
