ҚР Денсаулық сақтау министрлігі хабарлайды: «Қазақстан климат өзгерісінің халық денсаулығына төндіретін қауіптеріне қарсы бірлесіп әрекет етуге шақырды. Климаттың өзгеруі жұқпалы аурулардың таралу қаупін арттырып, антибиотиктерге төзімділіктің күшеюіне ықпал етіп отыр. Бұл – қоғамдық денсаулыққа тікелей қауіп, деп мәлімдеді денсаулық сақтау министрі Ақмарал Әлназарова БҰҰ-ның Климаттың өзгеруі жөніндегі 31-конференциясы (COP31) аясында өткен «Климаттық жағдайларды ескеретін денсаулық сақтау технологиялары және олардың қолжетімділігі» атты жоғары деңгейдегі панельдік пікірталаста. Осы қауіптердің алдын алу үшін Қазақстан «Біртұтас денсаулық» тәсілін енгізіп, биоқауіпсіздікті дамытып, қатерлерді ерте анықтау жүйесін нығайтып жатыр. (…) Қазақстан Орталық Азия, Түркі мемлекеттері ұйымы және Еуразиялық экономикалық одақ елдеріне дәрі-дәрмек пен вакциналарды бірлесіп сатып алуды ұсынды. Бұл олардың құнын төмендетіп, тұрақты жеткізілуін қамтамасыз етуге мүмкіндік береді. Сондай-ақ Қазақстан тәжірибе алмасуға арналған Анталия бастамасын (AIR) қолдады».
Еуразия24 пікірі:
Қазақстанның денсаулық сақтау министрі айтқан климат өзгерісінің қауіптері ғылыми зерттеулермен негізделген. Мәселе күннің жылынуынан жұқпалы аурулардың таралуымен ғана шектелмейді. Ауру қоздыратын бактериялардың антибиотиктерге төзімді бола түсуі де қауіп төндіреді.
2018 жылы халықаралық ғалымдар тобы беделді Nature Climate Change журналында «Antibiotic resistance increases with local temperature» («Жергілікті температура жоғарылаған сайын антибиотиктерге төзімділік артады») атты зерттеу жариялаған. АҚШ медициналық зертханаларының деректерін талдаған зерттеушілер температурасы жоғары өңірлерде ішек таяқшасының антибиотиктерге төзімді штамдарының үлесі 4,2%-ға жоғары болғанын анықтаған.
2020 жылы Eurosurveillance ғылыми журналында да осыған ұқсас тұжырымдар жарияланды. Ғалымдар Еуропаның 28 елінде 2000–2016 жылдары жиналған 4 миллионнан астам бактериялық изолятты зерттеген. Нәтижесінде температурасы жоғары елдерде кейбір бактериялардың антибиотиктерге төзімділігі жылдамырақ артатыны анықталған.
Демек, жаһандық жылыну адамзат онсыз да бірде табысқа жетіп, бірде қиындыққа тап болып отырған жұқпалы аурулармен күресті одан әрі күрделендіруі мүмкін.
Сондықтан Қазақстанның Орталық Азия, Түркі мемлекеттері ұйымы және Еуразиялық экономикалық одақ елдерін күш біріктіруге шақыруы дипломатиялық бастама ғана емес, шекарадан тыс таралатын қауіпке қарсы нақты шара ретінде қарастыруға тұрарлық. Ақмарал Әлназарова орынды атап өткендей, бактериялар мемлекеттік шекараға бағынбайды, ал климаттың өзгеруін шекара бекеттері тоқтата алмайды.
Тегтер: Қазақстан, БҰҰ, ҚР Денсаулық сақтау министрлігі, Ақмарал Әлназарова, климаттың өзгеруі, бактериялардың төзімділігі, Еуразия24
