Бас прокуратура хабарлайды: «Алматыда «Көк кит» фильмінің премьерасы өтті. Фильм қазіргі қоғамдағы өзекті мәселелердің бірі — балалардың интернеттегі қауіпсіздігіне арналған. Картина бүкіл ел аумағында кең прокатқа шықты. Фильм Алматы қаласы прокуратурасының қолдауымен түсірілген және цифрлық кеңістіктегі қауіп-қатерлер, сондай-ақ жасөспірімдерге қауіпті ойындар мен деструктивті контенттің әсері туралы баяндайды. Сонымен қатар, картинада буллинг және отбасылық-тұрмыстық мәселелер де қозғалады. «Көк кит» — мемлекеттің қоғаммен мәдениет пен өнер арқылы диалог құрып, қауіптердің алдын алуға және ең қымбат құндылық — балалардың өмірі мен денсаулығын сақтауға бағытталған тиімді тәсілдерінің бірі болып табылады», — делінген Бас прокуратураның хабарламасында.
Евразия24 пікірі:
Балалардың денсаулығына кері әсер ететін жат әрекеттерге құқық қорғау саласы бей-жай қарамай отырғаны қуантады. Олар тіпті «Көк кит» фильмінің жарық көруіне қолдау білдірген. Алайда, фильмнің кадрларынан құралған қысқа роликтің өзінен-ақ бұл туындының балаларға арналмағаны аңғарылады. Ресми түрде 16+ жас шектеуі қойылғанымен, ондағы мазмұн — жасөспірімдер үшін тым ауыр әрі күрделі. Фильм прокуратура тарапынан кеңінен насихатталған соң, балалардың оны көруге талпынатыны сөзсіз. Интернет кеңістігінде шектеу жоқ. Бірақ олар бұл туындыдан қандай мағына түйеді? Құқық қорғау органдары жеткізгісі келген ой сол күйінде қабылдана ма? Көркем фильм – бұл авторлық идеяның көрінісі, сондықтан онда соңғы он жылда «өлім топтарымен» байланыстырылып жүрген «Көк киттің» орнына «көк дельфин» не «қызыл мысық» сияқты кез келген бейне қолданылуы мүмкін еді. Алайда біз прокуратураның назарын қазіргі жасөспірімдер арасында таралып жатқан әлдеқайда заманауи деструктивті әуестенулерге аударғымыз келеді – мәселен, «Қаш не өл» немесе Schoolboy Runaway. Олардың мазмұнын интернеттен оңай табуға болады. Сонымен қатар балалар кейде ешқандай назар аударарлық атауы жоқ, сырттай бейкүнә көрінетін онлайн ойындар арқылы да деструктивті топтарға қосылып жатады. Құқық қорғау органдары мұндай үдерістерден хабардар және бұл бағытта тиісті бақылау жүргізіп отыр деп үміттенеміз.
